Беларус президенти Александр Лукашенко Россия раҳбари Владимир Путин билан суҳбатда мамлакат ҳудудида иккинчи атом электр станцияси (АЭС) барпо этиш таклифини билдирди. Унинг айтишича, бу лойиҳа Украинанинг Россия назоратидаги ҳудудларига электр етказиб бериш мақсадида амалга оширилиши мумкин. Кремль сайти 26 сентябр куни учрашув баённомасини эълон қилди.
Лукашенко изоҳ беришича, янги станция Беларуснинг шарқий қисмида қурилиши мумкин. Унинг таъкидлашича, бу орқали Херсон, Запорижжия, Луханск ва Донецк каби Россия ўзиники деб ҳисоблаётган вилоятларга энергия узатиш кўзда тутилган.
«“Росатом” аллақачон атом энергетикаси соҳасини кенгайтириш имкониятларини ишлаб чиққан. Молиявий масалалар ҳақида омма олдида тўхталмайман, лекин бизда турли вариантлар мавжуд. Агар зарурат туғилса, янги блок ёки бутун бошли станция қуришга дарҳол киришиш мумкин», — деди Лукашенко.
Россия президенти эса таклифга эҳтиёткорона муносабат билдирди: «Агар электр энергиясини олиб, белгиланган таъриф бўйича тўлайдиган истеъмолчи бўлса, бу умуман муаммо эмас», — деди Путин.
«Замин»ни Telegram’да ўқинг!
