Украина президенти Владимир Зеленский мамлакат Хавфсизлик хизмати (СБУ)нинг Россияга қарши янги операция режасини маъқуллади. Бу ҳақда у ўзининг Telegram-каналида маълум қилди.
«Мен СБУ бўйича бир нечта режаларни тасдиқладим — улар Россиянинг уруш ҳаракатларига бизнинг ассиметрик жавобимиз бўлади», — деб ёзди Зеленский Хавфсизлик хизмати раҳбари Васил Малюк билан узоқ масофали зарбалар натижалари муҳокамасидан сўнг.
Давлат раҳбари, шунингдек, Украина Қуролли кучларининг Бош қўмондони Александр Сирскийнинг ҳисоботини тинглаганини ва Россия жуда катта йўқотишларга учраганини таъкидлади.
«Эндиликда диққатимиз Добропилля операциясига қаратилган — бу бизнинг қарши ҳужумимиз ҳисобланади. Мудофаа бошқа йўналишларда ҳам давом этмоқда. Купянск шаҳри ва унинг атрофида жанговар ҳаракатларда иштирок этаётган ҳар бир аскарга миннатдорчилик билдираман. Новопавливске йўналиши ҳам осон эмас, у ерда фаол мудофаа ҳаракатлари олиб борилмоқда ва маълум ютуқлар бор», — деди у.
Зеленскийнинг таъкидлашича, Украина узоқ масофага учувчи дрон ва ракеталарни жадал ривожлантирмоқда ва уларнинг самарадорлиги тобора ортиб бормоқда.
“Zamin”ни Telegram'да ўқинг!
