Ослодаги маросимида Нобел қўмитаси 2025 йилги тинчлик мукофотини венесуэлалик сиёсий арбоб Мария Корина Мачадога топширишини эълон қилди. Қўмита раиси Йорген Ватне Фриднеснинг таъкидлашича, мукофот «Венесуэла халқининг демократик ҳуқуқларини қатъият билан ҳимоя қилиш йўлидаги тинимсиз саъй-ҳаракатлари» учун берилмоқда.
Бу йил мукофотга жами 338 та номзод кўрсатилди: 244 нафари — жисмоний шахс, 94 таси — ташкилот. Солиштириш учун, ўтган йили 286 номзод (197 шахс, 89 ташкилот) қайд этилган, рекорд кўрсаткич эса 2016 йилда — 376 номзод бўлган.
Яқин йилларнинг лауреатлари
2024: Nihon Hidankyo — Хиросима ва Нагасакидaги атом бомбардимонлари жабрдийдалари кенгаши, ядровий қуролсизланиш учун олиб борган фаолияти учун.
2023: Наргис Муҳаммадий — Эронда аёллар ҳуқуқлари ва инсон эркинликларини қўллаб-қувватлагани учун.
2022: Россия «Мемориал» ташкилоти, Украина Фуқаролик эркинликлари маркази ва Беларусдан Алес Беляцкий — инсон ҳуқуқларини ҳимоя қилишдаги ҳиссаси учун.
2021: Дмитрий Муратов ва Мария Ресса — матбуот эркинлиги ва демократияни ҳимоя қилишдаги жасорати учун.
Нобел ҳақида қисқача
Физиология/тиббиёт, физика, кимё, адабиёт ва тинчлик бўйича Нобел мукофотлари динамит ихтирочиси Алфред Нобел васиятига биноан таъсис этилган бўлиб, 1901 йилдан буён топшириб келинади.
Мачадога берилган бу эътироф Лотин Америкасида демократия ва фуқаролик қадриятлари учун олиб борилаётган курашнинг глобал аҳамиятини яна бир бор кўрсатиб турибди.
“Zamin”ни Telegram'да ўқинг!
