Шимолий Кореяда Корея Меҳнат партиясининг 80 йиллиги муносабати билан катта ҳарбий парад бўлиб ўтди. Тантанали маросимда илк бор янги қитъалараро баллистик ракета — “Хвасон-20” жамоатчиликка намойиш этилди, деб хабар берди Корея Марказий ахборот агентлиги (KCNA).
Бу Шимолий Корея ҳарбий салоҳиятидаги янги босқич сифатида баҳоланмоқда. Маълумотларга кўра, сентябрь ойида мамлакат етакчиси Ким Чен Ин “махфий қурол” яратилганини эълон қилганди. Унинг сўзларидан кейин Жанубий Корея мутахассислари бу қурол айнан “Хвасон-20” ёки унинг янги модификацияси бўлиши мумкинлигини тахмин қилишган.
Парадда “Хвасон-20” гипертовушли ўрта масофали ракеталардан кейин намойиш этилди. KCNA маълумотига кўра, ушбу ракета янги технологиялар асосида ишлаб чиқилган бўлиб, у бир нечта жанговар каллакларни олиб юриш қобилиятига эга.
Шу билан бирга, парадда янги авлод ҳужум қуроллари тизимлари, гипертовушли ракеталар ва ядровий сув ости кемалари моделлари ҳам кўрсатилди. Бу Ким Чен Ин режими мамлакат мудофаа соҳасидаги илғор имкониятларини намоён қилиш учун муҳим қадам сифатида кўрилмоқда.
Таҳлилчилар фикрича, “Хвасон-20”нинг омма олдида намойиш этилиши Шимолий Кореянинг халқаро босимга қарамай ўз ҳарбий дастурини кенгайтириш нияти борлигини англатади. Уларга кўра, бу қадам Вашингтон ва Сеул учун жиддий сиёсий сигнал бўлиши мумкин.
Шимолий Корея томони бу қуроллар мамлакат мустақиллиги ва хавфсизлигини таъминлаш учун мўлжалланганини таъкидламоқда. Аммо халқаро ҳамжамият бу каби намойишлар минтақадаги кескинликни янада кучайтириши мумкинлигидан хавотирда.
Шундай қилиб, Пхеньян ҳарбий кучини намойиш этиш орқали ўз мавқеини яна бир бор намоён қилди — бу эса минтақадаги мувозанатга таъсир этмасдан қолмайди.
“Zamin”ни Telegram'да ўқинг!
