Украина президенти Владимир Зеленский бир қатор шахсларни мамлакат фуқаролигидан маҳрум этди. Бу ҳақда “Суспильне” нашри президент девонидаги манбага таяниб хабар берди.
Маълумотларга кўра, фуқароликдан маҳрум қилинганлар орасида Одесса шаҳар мэри Геннадий Труханов, собиқ халқ депутати Олег Царёв ва машҳур балет раққоси Сергей Полунин ҳам бор.
"Айрим шахсларнинг Россия фуқаролигига эга экани аниқланди. Шу муносабат билан уларни Украина фуқаролигидан чиқариш тўғрисидаги фармонни имзоладим", — деди Зеленский.
Эслатиб ўтамиз, октябрь ойи бошларида Одессада кучли ёмғир оқибатида ўн киши ҳалок бўлган эди. Шундан кейин шаҳар аҳолиси мэр Трухановни фуқароликдан маҳрум этишни сўраб, президентга йўлланган петицияни бир сутка ичида 25 мингдан ортиқ киши имзолаган.
Геннадий Труханов эса айбловларни рад этиб, Россия паспортига эга эмаслигини ва бу даъволар "сиёсий мақсадларда ишлатилаётганини" таъкидлади.
“Zamin”ни Telegram'да ўқинг!
