Афғонистон ва Покистон чегарасидаги муносабатлар яна кескинлашди. Покистон армияси Афғонистон пойтахти Кобулга ҳаво ҳужуми уюштирди, деб хабар бермоқда Amaj News. Маълумотларга кўра, пойтахтнинг Таймани туманидаги бир неча нишонларга ҳарбий самолётлар орқали камида тўртта ракета билан зарба берилган.
Samaa TV ёзишича, «Толибон» ҳаракатининг Спин-Болдак ҳудудидаги позициялари ҳам Покистон ҳаво кучлари томонидан ҳужумга учраган. Шу билан бирга, Қандаҳор вилоятидаги «Толибон» бошпаналарига аниқ зарбалар йўлланган — натижада 4-батальон ва 6-чегара бригадаси «йўқ қилингани» хабар қилинган. Манбалар маълумотига кўра, толибларнинг йўқотишлари 200 кишигача етган.
Бу ҳужум икки давлат ўртасидаги сўнгги йиллардаги энг хавфли ҳолатлардан бири сифатида баҳоланмоқда. Reuters агентлиги «Толибон» вакилига таяниб хабар беришича, чегарадаги тўқнашувлар оқибатида камида 12 нафар тинч аҳоли ҳалок бўлган, 100 дан ортиқ киши яраланган.
«Толибон» ҳаракатининг баёнотида таъкидланишича, жангни Покистон бошлаган, афғон кучлари эса бунга жавобан «кўплаб покистонлик аскарларни» йўқ қилган ва уларнинг постларини эгаллаб олган. Покистон ҳукумати эса аксинча, ҳодиса учун жавобгарликни «Толибон» зиммасига юклади ва ўз ҳудудида тўрт нафар тинч аҳоли яраланганини маълум қилди.
Икки қўшни давлат ўртасидаги бу зиддиятнинг илдизи бир неча ҳафта олдин бошланган. 9 октябрь куни «Толибон» билан боғлиқ «Таҳрики Толибон Покистон» ҳаракати Қуррам чегара округидаги ҳарбий конвойга ҳужум қилган. 10 октябрда эса Покистон Кобулда гуруҳ етакчиларидан бирига ракета зарбаси берган. Ортидан «Толибон» чегара постларига жавоб ҳужуми уюштирган.
Аналитиклар фикрича, Афғонистон ва Покистон ўртасидаги бу янги кескинлик минтақадаги хавфсизлик вазиятини янада мураккаблаштириши мумкин. Чегара ҳудудларидаги ҳарбий тўқнашувлар нафақат икки давлат, балки бутун Марказий ва Жанубий Осиё барқарорлиги учун жиддий хавф туғдирмоқда.
Шундай қилиб, Кобулга берилган бу зарба икки давлат муносабатларида янги инқироз босқичини бошлади — вазиятнинг қай томонга бурилиши ҳозирча ноаниқ.
“Zamin”ни Telegram'да ўқинг!
