АҚШ президенти Дональд Трамп мамлакатнинг Марказий разведка бошқармасига (МРБ) Венесуэла ҳудудида махфий операциялар амалга ошириш учун расман рухсат берганини маълум қилди. Бу ҳақда у чоршанба куни Оқ уйда журналистлар билан суҳбат чоғида айтди.
Маълумотларга кўра, қарор АҚШ ҳарбий кучлари Кариб денгизи акваториясида наркотик моддалар ташишда гумон қилинган кемаларга берган зарбаларидан сўнг қабул қилинган. Сентябрдан буён камида бешта қайиқ йўқ қилинган ва 27 киши ҳалок бўлган. Улардан тўрттаси Венесуэладан чиққан бўлгани айтилмоқда.
Трампнинг сўзларига кўра, Вашингтон бу қадамни икки асосий сабаб билан қўллаган.
“Мен буни икки сабаб билан санкция қилдим. Биринчидан, улар ўз турмаларидаги маҳбусларни Америка Қўшма Штатларига юборишди. Иккинчидан, Венесуэладан АҚШга катта миқдорда гиёҳванд моддалар кириб келмоқда ва уларнинг кўп қисми денгиз орқали ташилади,” — деди Трамп.
Президент қўшимча қилганича, маъмурият “қуруқликдаги зарбаларни ҳам кўриб чиқмоқда”. Бу эса Вашингтоннинг Венесуэлага нисбатан кескин сиёсатини янада кучайтираётганини кўрсатади.
Шу куни Венесуэла президенти Николас Мадуро миллий телевидениеда чиқиш қилиб, МРБ фаолиятини қоралади ва тинчликка даъват этди. У МРБнинг “режим алмаштириш амалиётлари”ни Афғонистон, Ироқ ва Ливиядаги фожиалар билан таққослаб, “МРБ амалга оширган тўнтаришларга йўқ деймиз!” — дея таъкидлади.
Мадуро 1973 йилдаги Чили тўнтаришини ҳам эслаб ўтди ва Лотин Америкаси янги зиддиятларни хоҳламаслигини билдирди.
Венесуэла Ташқи ишлар вазирлиги эса расмий баёнот билан чиқиб, Трампнинг сўзларини “урушга чорловчи ва хатарли” деб атади. “Бу баёнот халқаро ҳуқуқ ва БМТ Низомига зид бўлиб, жаҳон ҳамжамияти томонидан қораланиши керак”, — дейилади вазир Иван Гилнинг баёнотида.
АҚШ Конгрессининг икки партия вакиллари ҳам Трамп маъмуриятининг Венесуэла наркокартелларига қарши ҳарбий ҳаракатларини танқид қилган. Улар президентни Конгресс рухсатисиз уруш бошлаганликда айблади.
Таҳлилчилар фикрича, Трамп маъмурияти Венесуэлага нисбатан босимни кучайтириш орқали Лотин Америкасидаги нуфузини оширишга интилаяпти. Бироқ, ҳозирча ҳужум қилинган кемалар ҳақиқатан ҳам гиёҳванд моддалар ташиганига оид расмий далиллар мавжуд эмас.
Шундай қилиб, Вашингтон ва Каракас ўртасидаги зиддият яна бир босқичга кўтарилди — сиёсий тортишув энди очиқ ҳарбий форматда давом этиши мумкин.
“Zamin”ни Telegram'да ўқинг!
