16 октябр куни Оқ уйда бўлиб ўтган матбуот анжуманида АҚШ президенти Доналд Трамп Россия ва Украина ўртасидаги уруш бўйича муҳим баёнот берди. Унинг сўзларига кўра, Вашингтон можарони кенг кўламли глобал урушга айлантирмаслик учун барча чораларни кўради.
“Менимча, бу учинчи жаҳон урушига олиб келиши мумкин, аммо бу ҳеч қачон амалга ошмайди”, — деди Трамп журналистлар саволларига жавоб берар экан. Унинг таъкидлашича, у ҳар қандай эҳтимолий кенгайишнинг олдини олиш учун шахсан масъулликни зиммасига олган.
Трампнинг фикрича, Украинадаги бугунги вазиятга сабаб — аввалги маъмурият томонидан йўл қўйилган хатолар. “Украина Путиннинг диққат марказида бўлган, аммо мен президент бўлган пайтимда у бундай қилмаган бўларди. Бу нотўғри сиёсий қарорлар оқибатида келиб чиққан ҳолат”, — деди Оқ уй раҳбари.
Президент шунингдек, лавозимга киришгач, Украина бўйича мавжуд сиёсатни “тўлиқ чалкашлик” деб баҳолаганини ҳам эслаб ўтди. Унинг фикрича, бу можарони фақат “инсонларнинг руҳини сақлаб қолиш учун” тугатиш зарур.
“Мен буни биз учун эмас, Европанинг тинчлиги учун қилмоқдаман. Биз улардан бир океан узоқдамиз, аммо улар бу уруш тугашини хоҳлайди. Улар бунга эришолмаяпти, аммо мен қила оламан”, — деди Трамп. Унинг таъкидлашича, Украинадаги тинчлик фақат мулоқот орқали тикланиши мумкин ва бу жараёнда АҚШ етакчи ролни ўйнаши керак.
Матбуот анжумани давомида Трамп Владимир Путин билан Будапештда ўтказилиши режалаштирилган учрашув ҳақида ҳам маълум қилди. Унинг айтишича, музокара “эҳтимол икки ҳафта ичида” бўлиб ўтади.
“АҚШ давлат котиби Марко Рубио Россия ташқи ишлар вазири Сергей Лавров билан дастлабки учрашувни ўтказади. Шунингдек, вице-президент Жей Ди Вэнс ва махсус вакил Стив Уиткофф ҳам музокараларда иштирок этади”, — деди Трамп.
Сиёсатчилар фикрича, Трампнинг бу баёноти Россия ва Украина ўртасидаги музокаралар қайта фаоллашишига йўл очиши мумкин. Унинг Будапештдаги учрашуви можарони дипломатик йўл билан ҳал қилиш сари муҳим қадам сифатида баҳоланмоқда.
Таҳлилчилар таъкидлашича, Вашингтоннинг янгиланган позицияси Европа хавфсизлигида янги босқич бошланишини англатиши мумкин. Трампнинг ўзи эса бу миссияни “инсон ҳаётини сақлаб қолиш ва тинчликни тиклаш вазифаси” деб атади.
“Zamin”ни Telegram'да ўқинг!
