АҚШ Энергетика вазирлигининг ядро объектларига кириш ҳуқуқига эга бўлган ходими иш серверига 187 мингдан ортиқ эротик сурат юклагани сабабли хавфсизлик рухсатидан маҳрум бўлди. Бу ҳақда 404 Медиа нашри хабар берди.
Маълум бўлишича, эркак ўзининг шахсий порнографик архивини ҳукумат компьютерига “тасодифан” юклаб олган. У бу материаллардан сунъий интеллект асосидаги “робот порнографияси” яратиш учун ўқув базаси сифатида фойдаланмоқчи бўлган.
Орадан олти ой ўтиб, ҳамкасблари ички серверда ўн минглаб очиқ саҳнали суратлар тўпланганини пайқаб, текширув бошлашган. Аниқланишича, ходим 1990 йиллардан буён тўплаб келган архивини иш компьютерига кўчирган, бироқ тизим шахсий ва корпоратив файлларни ажратмаслигини билмаган.
Ҳисоботда қайд этилишича, у йиллар давомида депрессиядан азият чеккан ва ўзини “ниҳоятда ёлғиз” ҳис қилган. У сўроқ жараёнида айбини тан олган, бироқ ўз ҳаракатини “катта жиноят эмас” дея ҳимоя қилган. Шунингдек, раҳбариятнинг “ортиқча қаттиққўллигидан” норозилик билдирган ва тергов жараёнини “Испан инквизицияси”га қиёслаган.
Ходим хавфсизлик рухсатидан маҳрум этилгач, апелляция шикояти билан мурожаат қилган. Аммо психологик баҳолаш натижалари унинг ҳолатини оғир деб топган ва қарор ўз кучида қолган.
“Zamin”ни Telegram'да ўқинг!
