Жума куни АҚШ президенти Доналд Трамп Оқ уйда Украина президенти Владимир Зеленскийни қабул қилди. Суҳбатнинг асосий мавзуси Киевга узоқ масофали “Томагавк” қанотли ракеталарини сотиш имконияти бўлди. Украин томон бу қуролларга катта эҳтиёж сезаётганини таъкидлади.
Учрашув Трампнинг Россия президенти Владимир Путин билан телефон орқали олиб борган узоқ суҳбатидан бир кун ўтиб бўлиб ўтди. Москва Вашингтонни бу келишув орқали можарони кучайтиришда айблашидан огоҳлантирган бўлса-да, Трамп Украинага ҳарбий ёрдам бериш масаласида қаттиқ турибди.
“Менимча, президент Путин бу урушни тугатишни хоҳлайди,” — деди Трамп журналистлар олдида Зеленский билан музокаралар бошланишидан аввал. Шу билан бирга, у “Томагавк” ракеталарини сотиш масаласи эҳтиёткорлик билан кўриб чиқилишини таъкидлади.
Зеленский эса Ғазо секторидаги вазиятдан кейин Трампнинг “Россияни тўхтатиш учун кучли туртки олганини” қайд этди. Америка раҳбари унга жавобан: “Биз бу ҳақда гаплашамиз. Украинага қуроллар керак — Европа бунинг учун тўлайди, биз эса урушга нуқта қўйишни хоҳлаймиз,” — деди.
Трампнинг айтишича, “Томагавк”лар — жуда хавфли қурол бўлиб, уларни етказиб бериш можаро даражасини ошириши мумкин. Шу сабаб, Вашингтон “эҳтиёткор ёндашув”ни танламоқда.
Америка президенти инсон ҳаётини сақлаб қолишни асосий вазифа сифатида кўришини ва “ўз фаолияти давомида миллионлаб одамларнинг ҳаётини сақлаб қолганини” таъкидлади. Унинг фикрича, Украинадаги урушни тўхтатиш ҳам шу миссиянинг бир қисми бўлади.
Зеленскийнинг Оқ уйдаги ташрифи фақат ҳарбий ёрдам масаласи билан чегараланмади. Украина раҳбари Трампга қазилма ёқилғи соҳасида ҳам бизнес таклифини илгари сурди. У Америкада ишлаб чиқарилаётган суюлтирилган газни Украина омборларида сақлаш орқали АҚШга Европа энергия бозорига чиқиш имконини яратишни таклиф қилди.
Пайшанба куни Зеленский АҚШ энергетика вазири Крис Райт ва йирик Америка компаниялари раҳбарлари билан ҳам учрашди. У энергия инфратузилмасини тиклаш ва Америка бизнесининг Украинадаги иштирокини кенгайтириш муҳимлигини таъкидлади.
Ҳозирча “Томагавк”лар бўйича аниқ келишувга эришилмаган, бироқ сиёсий таҳлилчилар бу музокарани Вашингтоннинг Киевга бўлган стратегик қўллаб-қувватлови рамзи сифатида баҳоламоқда.
“Zamin”ни Telegram'да ўқинг!
