Вашингтондаги Оқ уйда АҚШ президенти Доналд Трамп ва Украина раҳбари Володимир Зеленский ўртасида муҳим учрашув бўлиб ўтди. Суҳбат чоғида асосий эътибор Украинадаги уруш, қурол-яроғ масаласи ва икки давлат ҳамкорлигининг янги йўналишларига қаратилди.
Трамп матбуот олдидаги чиқишида Украинага Tomahawk қанотли ракеталарини бериш масаласига тўхталар экан, бундай кучли қуроллардан фойдаланиш эҳтиёжи бўлмаслигидан умидворлигини билдирди. “Биз жараённи соддалаштиришга ҳаракат қиляпмиз. Гап жуда катта ҳажмдаги кучли қуроллар ҳақида кетмоқда. Умид қиламанки, уларни ишлатишга ҳожат қолмайди. Tomahawk’сиз ҳам урушни тугатиш мумкин”, — деди АҚШ президенти.
Зеленский эса жавобан замонавий урушни “технологик можаро” деб атади ва мамлакатга кўпроқ дронлар кераклигини таъкидлади. Унинг сўзларига кўра, Украина ҳозир нафақат қурол-яроғга, балки янги технологияларга ҳам муҳтож. “Бизда турли қуроллар кўп, лекин дронлар асосий устунликни беради. Шу боис АҚШ билан биргаликда дрон ишлаб чиқаришни таклиф қиламан”, — деди Зеленский.
Трамп бу таклифни ижобий қабул қилди ва АҚШнинг ҳам дрон технологияларига қизиқиши юқори эканини таъкидлади. Унинг фикрича, бу ҳамкорлик икки давлат учун манфаатли бўлиши мумкин. “Биз Украинага Tomahawk эмас, балки дронлар беришни афзал кўрамиз. Улар урушни тугатишда тез ва аниқ восита бўлади”, — деди у.
Президент Трампнинг таъкидлашича, Россия раҳбари Владимир Путин ҳам уруш тугашини хоҳламоқда ва “энди бу жараённи амалга ошириш керак”. Шунингдек, у Будапештда бўлиб ўтадиган Путин билан учрашуви катта эҳтимол билан Зеленский иштирокисиз ўтишини ҳам айтди.
Эслатиб ўтамиз, Трамп аввалроқ агар Россия билан музокаралар натижа бермаса, Украинага ракеталар етказилиши мумкинлигини билдирганди.
Москва эса Украинага Tomahawk ракеталарининг берилишига кескин қарши чиқмоқда. Владимир Путиннинг сўзларига кўра, бу қуроллар жанг майдонидаги вазиятни тубдан ўзгартирмайди, аммо АҚШ ва Россия ўртасидаги муносабатларга жиддий салбий таъсир кўрсатиши мумкин.
Учрашувдан сўнг икки давлат делегациялари икки томонлама ҳамкорлик ва иқтисодий алоқаларни кенгайтириш бўйича музокараларни давом эттирди.
“Zamin”ни Telegram'да ўқинг!
