АҚШнинг Мичиган штатида истиқомат қилувчи уч ёшли бола Коди Жеймс Уильямс бутун мамлакатда қаҳрамон сифатида танилди. У онасининг ҳаётини қутқариб қолди ва катталар ҳам ўрнак оладиган жасорат намоён этди, деб ёзади The Guardian.
Маълумотларга кўра, воқеа аёл оғир эпилептик тутқаноқ хуружига дучор бўлган пайтда содир бўлган. Онасининг аҳволини кўрган кичик Коди ҳеч иккиланмасдан ҳаракатга ўтган. У аввал ҳам онасининг бу касаллигидан азият чекканини кўргани учун вазиятда ўзини йўқотмаган.
Бола онасининг телефонини олган, юзига тутиб қулфини очган ва 911 рақамига қўнғироқ қилган. Бу уч ёшли бола учун ғайриоддий ҳол бўлса-да, у вазиятни тўғри баҳолай олган. Бир неча дақиқа ичида тез ёрдам хизмати етиб келиб, онасининг ҳаётини сақлаб қолган.
Маҳаллий полиция бўлими раҳбари Майкл Бушард бу воқеадан кейин махсус матбуот анжумани ўтказган. У болани “кичик депутат” деб атаб, унга рамзий полиция нишонини топширган. Бушарднинг таъкидлашича, Коди ҳақиқий жасорат ва тез фикрлаш намунасини кўрсатди.
“Бу воқеа ҳар бир ота-она учун катта дарс бўлди. Фарзандларни фавқулодда ҳолатларда тўғри ҳаракат қилишга ўргатиш қанчалик муҳим эканини яна бир бор англадик,” — деган полиция бошлиғи.
Ҳозирда Коди ва унинг онаси ўзини яхши ҳис қилмоқда. Қўшнилар ва маҳаллий жамоа уларни табриклаб, болага “қаҳрамон бола” деб ном берган. Коди эса ҳозирча ўз қилган ишининг нақадар катта аҳамиятга эга эканини тўлиқ англамаётган бўлса-да, унинг жасорати бутун мамлакат бўйлаб юракларни илитди.
“Zamin”ни Telegram'да ўқинг!
