АҚШ президенти Доналд Трамп Украина раҳбари Володимир Зеленский билан ўтган учрашувда кескин баёнотлар билан чиқиш қилди ва музокара вақтида жанг харитасини столдан ташлаб юборган. Бу ҳақда музокаралар жараёнидан хабардор манбаларга таяниб, The Financial Times хабар берди.
Манбалар маълумотига кўра, 17 октябр куни ўтган учрашув жуда тортишувли ва асабий муҳитда кечган. Зеленский билан баҳс чоғида Трамп бир неча марта товушини кўтарган ва “доимий равишда сўкинган”. Президентнинг айтишича, Украина томони жанг майдонидаги вазиятни тўлиқ назорат қилолмаётган.
Учрашув пайтида Зеленский олиб келган жанговар ҳаракатлар хариталари ҳам Трамп фикрини ўзгартирмаган. Гап давомида у Украинадаги фронт чизиғи акс этган харитани столдан улоқтириб юборган ва “бундай нарсаларни кўришдан зерикканини” айтган.
Газета манбасига кўра, АҚШ етакчиси Киевдан бутун Донбасс ҳудудини Россияга беришни ва Москва билан келишувга келишни талаб қилган. Шу билан бирга, Трамп Зеленскийни оғир огоҳлантириш билан таҳдид қилган: “Агар Путин хоҳласа, у сизни йўқ қилади”.
Маълумот учун, Трампнинг Россия президенти Владимир Путин билан телефон орқали суҳбати 16 октябр куни бўлиб ўтган. The Washington Post ёзганидек, Путин Донецк устидан тўлиқ назоратни тан олиш эвазига Запорижжя ва Херсон вилоятларининг бир қисмини Украинага қайтаришни таклиф қилган.
Шунингдек, июнь ойида Истанбулда бўлиб ўтган музокараларда Россия томони Украина қўшинларини бир нечта вилоятлардан чиқариш ёки уларнинг қайта жойлашишини тақиқлаш ҳақидаги икки вариантли меморандумни тақдим этгани айтилган.
FT'нинг таъкидлашича, учрашув давомида Трамп Путин билан бўлган суҳбатдаги тезисларни такрорлаган ва Зеленскийга “маърузалар ўқиган”. Музокаралардан сўнг Украина президенти жуда норози бўлган ва “ҳиссий тушкун ҳолатда” қолгани маълум қилинди.
Шу куни NBC News телеканалига берган интервьюсида Зеленский урушни тўхтатиш учун ҳар икки томон ўз позицияларида қолиши кераклигини айтди.
Ғарб нашрлари фикрича, Трамп можарони дипломатик йўл билан ҳал этиш тарафдори бўлиб, Россия билан келишувни ҳарбий ҳаракатларни тўхтатишнинг ягона ечими сифатида кўраётган бўлиши мумкин.
