Жанубий Кореяда яшовчи 42 ёшли Гил Ли Вон исмли аёл гўзаллик ортидан кетгани учун сўнгги 15 йилда 400 га яқин пластик операция ва косметик муолажаларни амалга оширган. У бунинг учун тахминан 300 миллион вон — яъни 210 минг доллар сарфлаган. Бу ҳақда tvN STORY телеканалидаги кўрсатувда маълум қилинди.
Гил Ли Вон биринчи марта 2010 йилда пластик жарроҳликка мурожаат қилган. Унинг айтишича, ўша пайтда университетга тайёргарлик кўраётган чоғида семириб кетган ва атрофдагиларнинг масхараси, шунингдек, севгилисининг танқидлари уни қаттиқ ранжитган. “Одамлар ташқи кўринишим ҳақида гапираверганидан кейин ўзимга ишончим йўқолди”, — деган у.
Шундан сўнг Гил ўзидаги норозиликни йўқотиш учун косметик операцияларни бошлаган ва орқага қайтмаган. У пешонага ёғ кўчириш, бурин ва ияк пластикаси, икки қовоқ жарроҳлиги, юз контурини тузатиш, липосакция ва турли дерматологик муолажаларни амалга оширган.
“15 йил ичида 400 га яқин муолажадан ўтганман. Улар вақт ўтиши билан секин-аста тўпланди. Ҳар бири менга янги ишонч берди”, — дейди Гил.
Аёлнинг сўзларига кўра, у айрим пайтларда танасига ортиқча аралашув қилишни ўйлаган, лекин шифокорлар унга ҳаддан ортиқ операциялар хавфли эканини айтган. Шу сабаб у ҳозирги қиёфасидан мамнун ва уни сақлаб туриш учун мунтазам дерматолог кўригидан ўтиб туради.
“Мен пластик жарроҳликдан афсусланмайман. Бу менга янги ҳаёт, янги ишонч ва янги ўзлигимни берди”, — деб таъкидлаган Гил Ли Вон.
Жанубий Корея дунёда пластик операциялар сони бўйича етакчи мамлакатлардан бири ҳисобланади — статистикага кўра, ҳар учинчи аёл ҳаёти давомида камида бир марта косметик амалиёт ўтказади.
“Zamin”ни Telegram'да ўқинг!
