АҚШ президенти Доналд Трамп Украинадаги урушни тугатиш масаласи бўйича янги баёнот билан чиқди. Давлат раҳбарига кўра, Вашингтон можарони тинч йўл билан ҳал қилиш учун барча саъй-ҳаракатларни амалга оширмоқда.
«Биз келишувга эришишга ҳаракат қиляпмиз. Агар у амалга ошса – бу барча учун жуда яхши бўлади. Лекин агар келишув бўлмаса, кўпчилик катта нарх тўлайди», — деди Трамп журналистлар билан суҳбатда.
Унинг таъкидлашича, АҚШ урушни тўхтатишни асосий дипломатик мақсад сифатида белгилаган ва бу жараёнда ҳам Москва, ҳам Киев билан мулоқотни сақлаб турибди.
Шу билан бирга, Трамп Украина ҳозирча ғалаба қозониши мумкинлигини, аммо бу эҳтимол жуда паст эканини таъкидлади. “Украина ҳали ҳам ғалаба қозониши мумкин, лекин бу эҳтимол анча оз. Биз барчасини тинч йўл билан ҳал этиш тарафдоримиз”, — деди у.
Оқ уй раҳбари Путин ва Зеленский ҳақидаги фикрларини ҳам очиқчасига билдирди. “Улар бир-бирини ёмон кўради, бу эса вазиятни янада мураккаблаштирмоқда,” — деди Трамп.
Маълумот учун, ўтган ҳафта Доналд Трамп Россия президенти Владимир Путин билан телефон орқали мулоқот қилган. Бу суҳбат 16 октябрь куни бўлиб ўтган ва эртаси куни Трамп Оқ уйда Украина президенти Володимир Зеленский билан юзма-юз учрашув ўтказган.
Суҳбатлардан сўнг АҚШ президенти Путин билан иккинчи учрашувни ўтказиш нияти борлигини маълум қилди. Унга кўра, бу саммит Будапештда бўлиб ўтиши мумкин. Ҳозирча аниқ сана белгиланмаган, аммо учрашув яқин ҳафталарда ўтказилиши кутиляпти.
Сиёсатшунослар фикрича, Трампнинг бу баёноти Украина атрофидаги дипломатик фаоллик янада кучайишидан дарак беради. Шунингдек, Вашингтон можарони узоқ муддатли сиёсий ечимга олиб келадиган янги форматни ишлаб чиқиш устидан ишлаяпти.
