АҚШ президенти Доналд Трамп Украина билан Россия ўртасидаги можарога оид янги фикр билдирди, деб хабар берди dw.com. Унинг сўзларига кўра, Киев назарий жиҳатдан ғалаба қозониши мумкин, аммо бу эҳтимол жуда паст.
«Улар ҳали ҳам ғалаба қозониши мумкин. Мен улар ғалаба қозонади деб ўйламайман, лекин назарий жиҳатдан улар бундай натижага эришиши мумкин. Мен ҳеч қачон улар албатта ғалаба қозонади демаганман. Ҳамма нарса бўлиши мумкин», — деди Трамп Австралия бош вазири Энтони Албанезе билан қўшма баёнот вақтида.
Бундан бир ойча олдин Оқ уй раҳбари Украина Европа Иттифоқи кўмагида ўзининг собиқ чегараларидаги ҳудудларни «жанг орқали қайтариб олишга қодир»лигини таъкидлаганди. «Вақт ўтиши билан Европа, айниқса НАТОнинг сабри ва молиявий ёрдами билан асл чегараларни тиклаш мумкин», — деганди у ўшанда.
Бироқ 19 октябрь куни Трамп Украина урушига барҳам бериш учун Донбасс минтақаси бўлиниши зарурлигини билдирди. Унинг фикрича, ҳудуднинг катта қисми Россия назоратида қолиши керак.
«Бу шундай қолсин. У аллақачон бўлинган. Менимча, минтақанинг тахминан 78 фоизи Россия томонидан назорат қилинади», — деди АҚШ президенти. Шу билан бирга, у Россия ва Украина “кейинроқ нимадир бўйича келишиб олиши мумкин”лигини ҳам қўшимча қилди.
Таҳлилчилар Трампнинг бу сўзларини унинг Украинага нисбатан эҳтиёткор ва прагматик сиёсатини давом эттириш сифатида баҳоламоқда. Унинг фикрича, урушни тинч йўл билан тугатиш АҚШ ва бутун дунё хавфсизлиги учун энг мақбул вариант бўлади.
“Zamin”ни Telegram'да ўқинг!
