Буюк Британиядаги Кроуборо шаҳрида содир бўлган бу воқеа тиббий амалиёт тарихига кириши аниқ. 65 ёшли Дениз Бэкон номли аёл чуқур мия стимуляцияси амалиёти (DBS) пайтида ҳушёр ҳолда кларнет чалди. Бу орқали шифокорлар унинг ҳаракат қобилияти ва мия фаолиятини реал вақтда кузатиш имконига эга бўлишган. Бу ҳақда “Daily Mail” нашри маълумот тарқатди.
Маълум бўлишича, Бэкон илгари нутқ ва тил терапевти бўлиб ишлаган, аммо 2014 йилда унга Паркинсон касаллиги ташхиси қўйилган. Кейинчалик унда мушак қотишлари, ҳаракатнинг секинлашиши, шунингдек, сузиш, рақсга тушиш ва кларнет чалишда қийинчиликлар пайдо бўлган.
Шу сабабли у Лондон клиникаларидан бирида чуқур мия стимуляцияси амалиётига рози бўлган. Тўрт соатлик операция давомида бемор ухлатилмаган — фақат бош териси анестезия қилинган. Жарроҳлар унинг миясига махсус электродларни ўрнатиш орқали электр импульсларини узатиб, ҳаракат қобилиятини тиклашни кўзлаган.
Нейрожарроҳ профессор Кейомарс Ашканнинг сўзларига кўра, электродлар жойлаштирилгандан сўнг Бэконнинг бармоқ ҳаракатлари сезиларли даражада яхшиланган. Шу заҳоти у кларнетни қўлига олиб, мусиқа чала бошлаган ва шифокорларни ҳайратга солган.
“Ҳаракатларим енгиллашди, бармоқларим эркинроқ қимиллай бошлади. Бу нафақат кларнет чалишни, балки юриш ва рақс тушишни ҳам осонлаштиради деб ўйлайман”, — дейди Дениз Бэкон амалиётдан сўнг.
Операция вақтида у мия фаолиятини стимуляция қилувчи ва ток орқали ишлайдиган махсус импульс генераторини танлаган. Бу қурилма беморнинг кўкрагига ўрнатилади ва 20 йилгача фаол ишлайди. Генератор мия сигналларини кузатиб, зарур ҳолларда автоматик равишда импульсларни бошқариш имконини беради.
Профессор Ашкан бу технология замонавий тиббиётдаги энг илғор усуллардан бири эканини таъкидлаб, “Чуқур мия стимуляцияси Паркинсон касаллиги билан боғлиқ ҳаракат бузилишларини самарали бошқаришга ёрдам беради. Энг муҳими, ҳар бир бемор учун индивидуал мослаштириш мумкин”, — деб қайд этди.
Шу тариқа, Дениз Бэконнинг амалиёти нафақат тиббий муваффақият, балки инсон руҳининг кучини ҳам намоён қилди — у оғир операция вақтида ҳам мусиқа орқали ҳаётга муҳаббатини ифода этди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
