Россия президентининг махсус вакили ва Россия тўғридан-тўғри инвестициялар фонди (РТИФ) раҳбари Кирилл Дмитриев АҚШга ташриф буюриб, Трамп маъмурияти вакиллари билан бир қатор учрашувлар ўтказди. Унинг таъкидлашича, Москва Украинадаги можарони имкон қадар тезроқ тугатишдан манфаатдор, деб хабар берди cnn.com.
Дмитриев CNN телеканалига берган интервьюсида бу позицияни очиқ баён этди:
«Биз бу можарони ҳар қандай йўл билан чўзилишини хоҳламаймиз. Барчамиз дипломатик ечимга умид қилаяпмиз. Россия тинчликни тиклаш тарафдори ва музокараларга тайёр», — деди у.
Унинг сўзларига кўра, Россия ҳозирги геосиёсий шароитда барқарорликни таъминлаш ва иқтисодий ҳамкорликни қайта тиклашни муҳим деб ҳисоблайди. Шу боисдан, Дмитриевнинг АҚШга ташрифи икки томонлама мулоқотни қайта фаоллаштириш мақсадида ўтмоқда.
Россия президентининг махсус вакили Трамп маъмурияти вакиллари билан бўлган музокараларда инвестиция, хавфсизлик ва дипломатик алоқаларни қайта йўлга қўйиш масалаларини муҳокама қилгани маълум қилинди.
Дмитриев таъкидлаганидек, ҳарбий ҳаракатлар нафақат Украина, балки бутун минтақавий иқтисодга салбий таъсир кўрсатмоқда. «Биз фақат сиёсий ечим орқали ҳақиқий барқарорликка эришиш мумкинлигига ишонамиз», — деди у.
Таҳлилчилар фикрича, Москва дипломатик ҳаракатларни фаоллаштириш орқали Ғарб билан мулоқотда янги саҳифа очишга интилмоқда. Шу билан бирга, АҚШ томонидан ҳам айрим доиралар можарони тинч йўл билан ҳал этиш тарафдори эканини билдирмоқда.
Халқаро кузатувчилар бу ташрифни икки мамлакат ўртасидаги муносабатларни юмшатиш йўлида эҳтимолий илк қадам сифатида баҳолашмоқда.
“Zamin”ни Telegram'да ўқинг!
