Украина уруши Путин рейтингига кучли туртки берди
Россияда ўтказилган сўровномага кўра, Владимир Путиннинг фаолиятини қўллаб-қувватлаганлар улуши 65 фоизга етиб, кузатув тарихидаги рекорд натижани қайд этди. Украинадаги уруш бошланганидан кейин Путин фаолиятини қўллаб-қувватлаш даражаси 60 фоиздан ошган. Иосиф Сталин 45 фоизлик ижобий баҳо билан иккинчи ўринни эгаллади, Николай ИИ ва Леонид Брежнев ҳақидаги ижобий фикрлар ҳам ошди.
Россияда ўтказилган янги сўровнома натижаларига кўра, Владимир Путиннинг машҳурлиги сўнгги йиллардаги энг юқори даражага чиқди. Россия Фанлар академияси ҳузуридаги Ижтимоий-сиёсий тадқиқотлар институти маълумотларига асосан, иштирокчиларнинг 65 фоизи президент фаолиятини қўллаб-қувватлаган. Бу кўрсаткич бутун кузатув тарихи давомидаги рекорд натижа ҳисобланади.
Таъкидланишича, 2000 йилда фақат 12 фоиз россиялик Путинни “мамлакат учун фойдали” деб баҳолаган бўлса, 2018 йилда бу рақам 54 фоизга етган. Украинадаги уруш бошлангач, қўллаб-қувватлаш даражаси яна ошиб, 60 фоиздан ошган.
Сўров натижаларида иккинчи ўринни Иосиф Сталин эгаллади — унинг фаолиятини респондентларнинг 45 фоизи ижобий баҳолаган. Совет даври раҳбарининг рейтинги ҳам сўнгги ўттиз йил ичида энг юқори кўрсаткичга чиққан. 2016 йилда бу рақам 31 фоизни, 2022 йилда 40 фоизни, 2025 йилда эса 45 фоизни ташкил этган.
Шу билан бирга, Николай II (16 фоиз) ва Леонид Брежнев (24 фоиз) ҳақида ижобий фикр билдирганлар сони ҳам ортгани қайд этилган.
Энг салбий баҳолар эса Михаил Горбачёв ва Борис Елцинга тўғри келган. Россияликларнинг 59 фоизи Горбачёвни, 56 фоизи эса Елцинни мамлакат тарихидаги энг кўп зарар етказган раҳбарлар сифатида атаган.
Изоҳлар 0
…