Франция полицияси Лувр музейида содир этилган жуда йирик ўғирлик иши бўйича яна беш нафар кишини қўлга олди. Шу тариқа, мазкур жиноят доирасида ушланганлар сони етти нафарга етди, деб хабар берди маҳаллий ОАВ Париж прокурори Лаура Беккога таяниб. Аммо полиция ҳозирча ўғирланган 88 миллион евро (100 миллион доллардан ортиқ) қимматбаҳо буюмларни топа олмаган.
Прокурор RTL радиостанциясига маълум қилганидек, қўлга олинганлардан бири жиноят жойида қолдирилган ДНК излари орқали аниқланган. AFP агентлиги уни “асосий гумондор” деб таърифлади. “Биз уни кузатувда ушлаб тургандик. Қолганлар эса ўша куни содир бўлган воқеа ҳақида маълумот бериши мумкин бўлган шахслар”, — деди прокурор Лаура Бекко.
Бекко айтишича, ҳозирча гумонланувчилар ҳақида тўлиқ маълумот ошкор этишга эрта. Ушбу операция аввалроқ ўғирлик ва жиноий тил бириктириш айбловлари билан қўлга олинган икки нафар шахсга нисбатан айблов қўйилгандан кейин ўтказилган.
Маълумотларга кўра, илк икки гумондор ўтган шанба куни ҳибсга олинган бўлиб, улардан бири мамлакатни тарк этиб, Жазоирга қочмоқчи бўлган. Улар айбни қисман тан олган.
Эслатиб ўтамиз, ўғирлик 19 октябрь куни дунёдаги энг машҳур музейлардан бири бўлган Луврда содир бўлган. Жиноятчилар умумий қиймати 88 миллион еврони ташкил этувчи тарихий ва маданий бойликларни ўғирлаб кетишган. Тергов маълумотларига кўра, ҳужумда тўрт киши тўғридан-тўғри иштирок этган.
Сўнгги қўлга олиш амалиётлари Париж ва унинг атрофида, жумладан Сен-Сен-Дени департаменти ҳудудида кечки ва тунги вақтларда амалга оширилган. Аммо тинтувлар натижасида музейдан ўғирланган асарларни топишнинг иложи бўлмаган.
“Терговчилар ишни босқичма-босқич олиб боришмоқда ва гумонланувчилар доирасини секин-асталик билан торайтиришмоқда. Биз барча алоқадор шахсларни аниқлаш устида ишлаяпмиз”, — деди прокурор Бекко.
Унинг сўзларига кўра, ҳозирча ўғирланган асарларни сотишнинг иложи йўқ, чунки уларнинг жаҳон музейлари ва коллекционерлар рўйхатларида расмий қайди мавжуд. “Мен бу буюмлар топилиши ва Луврга, яъни миллатнинг маънавий мулкига қайтарилишидан умидворман. Агар кимдир уларни ихтиёрий равишда қайтарса, суд бу ҳолатни енгиллаштирувчи омил сифатида кўради”, — деди у.
Прокуратура маълумотларига кўра, тергов доирасида 150 дан ортиқ ДНК намунаси, бармоқ излари ва бошқа далиллар текширилмоқда. Шунингдек, жамоат ва хусусий кузатув камералари ёрдамида жиноятчилар ҳаракатлари кузатилган, уларнинг айримлари ўғирлик пайтида юзларини ниқоб билан беркитган ва ёрқин нимчалар кийган ҳолда ҳаракат қилган.
Терговчилар Лувр ходимларининг жиноятга алоқадор бўлиши эҳтимолини рад этди. Аммо музейдаги хавфсизлик тизими ва ички назорат жараёнлари бўйича текширувлар давом эттирилмоқда.
Ҳозирча қимматбаҳо артефактлар қаерда экани номаълум, аммо француз полицияси “буюк маданий меросни қайтариш учун барча имкониятларни ишга солишини” маълум қилди.
“Zamin”ни Telegram'да ўқинг!
