Россия президенти Владимир Путин 2050 йилгача ҳокимиятда қолиш ниятида экани ҳақида янги маълумотлар тарқалди. Бу ҳақда британ нашри Daily Star суриштирувчи журналист Иля Давлятчинга таяниб хабар берди.
Маълумотларга кўра, 73 ёшли Путин Иосиф Сталиндан кейин Кремлни энг узоқ бошқарган раҳбар сифатида тарихга кирган ва ҳокимиятни яна камида 25 йил сақлаб қолишни режалаштираётгани айтилмоқда. Унинг режасига кўра, 97 ёшга етганида мамлакат бошқарувини ўғли Иванга топшириши мумкин. Иван ҳозир 10 ёшда, 2050 йилда эса 35 ёшга тўлади — айнан шу ёшда у сиёсий саҳнага чиқиши эҳтимол қилинмоқда.
Эслатиб ўтиш жоиз, 2020 йилда Россия конституциясига киритилган ўзгаришлар Путиннинг президентлик муддатларини “нолга тенглаштириш” имконини берди. Бу эса унга 2036 йилгача расман ҳокимиятда қолиш ҳуқуқини тақдим этади.
Путин ҳозирнинг ўзида ҳукмронлик давомийлиги бўйича бир қатор тарихий лидерларни ортда қолдирган: Пиночет (17 йил), Ким Чен Ир (17 йил), Муссолини ва Сухарто (20 йил), шунингдек, Руминия раҳбари Николае Чаушеску (24 йил). Агар у яна икки муддат фаолият юритса, Франциско Франко ва Антонио ди Салазар каби 36 йил ҳукмронлик қилган диктаторларни ҳам ортда қолдириши мумкин.
Журналист Давлятчининг таъкидлашича, Путиннинг бу нияти уни замонавий тарихдаги энг узоқ ҳукмронлик қилган сиёсий арбоблар қаторига киритади. Агар у ҳақиқатдан ҳам 2050 йилгача ҳокимиятда қолса, Муаммар Каддафий (42 йил), Ким Ир Сен (46 йил) ва Фидел Кастро (49 йил) кўрсаткичларидан ҳам ошиб кетади.
Шундай бўлса, Путин Россия тарихидаги Иван Грознийдан кейинги энг узоқ ҳукмронлик қилган раҳбарга айланади. Маълумки, Иван Грозний тахтда 50 йил давомида бўлган.
Айни пайтда Кремл ҳокимияти расмий изоҳ беришдан тийилган бўлса-да, сиёсатшунослар бу маълумотни Путиннинг янги сиёсий стратегияси ҳақидаги ишора сифатида баҳоламоқда.
“Zamin”ни Telegram'да ўқинг!
