Ироқ ҳукумати 4 ноябрь куни мамлакат тарихида муҳим қарор қабул қилди — энди давлат бензин, дизель ёки керосин импорт қилмайди. Бу ҳақда Al Arabiya нашри маълум қилди.
Бош вазир Муҳаммад Шиё ас Судани имзолаган ҳужжатга кўра, мамлакат эндиликда ёнилғини тўлиқ ички ишлаб чиқариш ҳисобига таъминлай олади. Бу нафақат иқтисодий жиҳатдан муҳим бурилиш, балки Ироқнинг энергетика соҳасидаги мустақиллиги сари ташланган қадам сифатида баҳоланмоқда.
Нефть вазири баёнотида таъкидланишича, ички завод ва қайта ишлаш мажмуалари ишлаб чиқаришни кескин оширган. Энди Ироқ нафақат бензин ва дизель бўйича ўз эҳтиёжини қоплаяпти, балки ортиқча ҳажмни ҳам экспортга чиқариш имкониятига эга бўлди.
Мутасаддиларнинг таъкидлашича, бу қарор Ироқ нефть соҳасининг жадал ривожланаётганидан далолат беради. Шу билан бирга, мамлакат халқаро энергетика бозорида ўз ўрнини мустаҳкамлаб бормоқда.
Маълумот учун, Ироқ ОПЕК ташкилотига аъзо бўлган йирик ишлаб чиқарувчи давлатлардан бири ҳисобланади. У кунига ўртача 3,6 миллион баррел нефть экспорт қилмоқда.
Давлат нефть маркетинги компанияси СОМО маълумотларига кўра, 2024 йилнинг сўнгги чорагида Ироқ ташқи бозорларга 4,4 миллион тоннадан ортиқ нефть маҳсулотларини сотган. Улардан қарийб 4,2 миллион тоннаси мазутга тўғри келган — бу эса 2023 йилнинг шу даврига нисбатан анча юқори кўрсаткичдир.
Мутахассисларнинг сўзларига кўра, октябрь ойидаги экспорт ўсиши ички бозорда талабнинг камайиши ва ишлаб чиқариш ҳажмининг ортиши билан изоҳланади. Асосий харидорлар орасида Ҳиндистон ва Сингапур етакчи ўринни эгаллаган.
“Zamin”ни Telegram'да ўқинг!
