Португалиялик афсона Криштиану Роналду яқинда узоқ йиллардан буёнги турмуш ўртоғи Жоржина Родригесга никоҳ таклифини қилгани ҳақида журналист Пирс Морган билан суҳбат давомида гапириб берди.
Унинг сўзларига кўра, бу воқеа режалаштирилмаган ҳолда, кечаси уйдаги шодлик лаҳзасида рўй берган.
«Тунги соат бирлар эди, қизларим ухлаб қолишганди. Дўстларимдан бири менга Жоржинага совға қилиш учун узук берди. Шу пайтда икки болам кириб келди ва: “Дада, сиз онамизга турмуш қуришни таклиф қиласиз!” — деди. Шу сўзларни эшитгач, бу энг тўғри пайт эканини англадим. Болалар шундай дейишгани ва дўстларим ҳаммасини видеога олишгани учун мен буни хоҳлаётганимни тушундим ва таклиф қилдим. Мен тиззалаб ўтирмадим, чунки бунга тайёр эмасдим, лекин бу ажойиб лаҳза эди. Ортиқча гапирмасдан, содда нутқ сўзладим. Бу лаҳза ҳақиқатан ҳам самимий ва жуда хотиржам кечди», — дейди Роналду.
Унинг айтишича, бу воқеа махсус режа эмас, балки ўзига хос табиий ва дилдан чиққан қадам бўлган.
«Мен романтик инсонман, лекин ҳар ҳафта гул олиб келадиган тип эмасман. Менинг романтикам сўзда эмас, амалда намоён бўлади. Жоржина мен учун бир умрлик аёл эканини илгариёқ билганман. Шунинг учун бу таклифни шундай содда, лекин чин дилдан қилдим», — дея қўшимча қилди у.
Футбол юлдузининг бу самимий иқрори мухлислар орасида кенг муҳокама қилинди. Кўпчилик Роналдунинг бу қадамини “ҳақиқий муҳаббатнинг ифодаси” деб атади.
Жоржина Родригес эса ўзининг ижтимоий тармоқ саҳифасида Роналду билан сурат жойлаб, “Ҳа, дедим” деб ёзган. Шу билан дунёдаги энг машҳур жуфтликлардан бири расман турмуш йўлига қадам қўйиш арафасида экани маълум бўлди.
