Филиппин пойтахти Манила шаҳрида бўлиб ўтган “Дунё гўзали 2025” танловида Чехия вакили Натали Пушкинова мутлақ ғолиб деб топилди, деб хабар берди Critical Beauty Philippines.
21 ёшли Пушкинова Прага яқинида яшайди ва Карл университетида “Маркетинг коммуникациялари ва оммавий алоқалар” йўналишида таҳсил олади. У бир неча йилдан бери модель сифатида фаолият юритиб келади.
Танлов финалида 79 давлат гўзаллари иштирок этди. “Ҳаво маликаси” унвонини исландиялик Соллис Вала Иварсдоттир, “Сув маликаси” номини вьетнамлик Чин Ми Ан, “Олов маликаси” унвонини эса таиландлик Вари Нгамкҳам қўлга киритди. Энг яхши кўриниш учун соврин Колумбияга, кечки либос намойиши учун эса Куба вакиласига берилди.
Пушкинова интервьюсида илгари анорексиядан азият чекканини ва модель агентлиги уни соғлиғига хавф соладиган даражада вазн йўқотишга мажбурлаганини айтган. У шуни ортидан ўз ҳаётида янги саҳифа очганини таъкидлаган.
Қизиқ жиҳати шундаки, Натали Пушкинова рус шоири Александр Пушкин билан узоқ қариндош бўлиши мумкинлигини ҳам инкор этмайди.
Маълумот учун, “Дунё гўзали” танлови 2001 йилдан бери ўтказилади ва “Miss Universe”, “Miss World” ҳамда “Miss International” билан тенг даражадаги йирик гўзаллик мусобақаси ҳисобланади. Танловнинг асосий мақсади — гўзаллик орқали экология ва атроф-муҳит муҳофазаси ҳақидаги онгни оширишдир.
Ғолиблар кейинчалик турли мамлакатларда атроф-муҳитни ҳимоя қилиш бўйича элчи сифатида фаолият юритади.
“Zamin”ни Telegram'да ўқинг!
