Санкт-Петербургнинг Невский туманидаги Дыбенко кўчасида жойлашган ярим ертўла кафеда ноҳуқуқий спиртли ичимликлар савдоси ташкиллаштирилгани аниқланди. Мазкур ҳолат ҳуқуқни муҳофаза қилиш органлари диққатини тортиб, кафега рейд ўтказилди.
Текширув давомида муассасанинг тегишли лицензиясиз фаолият юритаётгани маълум бўлди. Полиция ходимлари кафеда машҳур брендларнинг бўш шишаларига тўлдирилган ва қимматбаҳо виски, жин ҳамда коняк сифатида тақдим этилган сохта спиртли ичимликларни аниқлашди.
Бундан ташқари, кафеда миграция қонунчилиги қоидалари бир неча бор бузилгани қайд этилди. Бузувчилар орасида нафақат мижозлар, балки кафе ходимлари, шу жумладан, 39 ёшли ўзбекистонлик кафе эгаси ҳам бор эди.
Маълум бўлишича, у илгари ҳам судланган. Кафе эгаси текширув жараёнида жавобгарликдан қочишга уриниб, полиция ходимларидан бирига пора таклиф қилди.
У 100 минг рублни полиция формасининг чўнтагига яширинча жойлаштиришга ҳаракат қилди. Бироқ унинг бу уринишлари муваффақиятсиз якунланди – тадбиркор дарҳол ушланиб, пул далилий ашё сифатида олиб қўйилди.
Сохта спиртли ичимликлар экспертизага юборилди. Россия тергов органлари ушбу ҳолат юзасидан пора таклиф қилишга уриниш ва бошқа қонунбузарликлар бўйича жиноят иши қўзғатди.
Кафеда рўйхатдан ўтмаган ҳолда бўлган чет эллик фуқаролар миграция қонунчилигига мувофиқ маъмурий жавобгарликка тортилди.
