Португалия терма жамоаси сардори Криштиану Роналду яқин дўсти ва жамоадоши Диогу Жотанинг дафн маросимида қатнашмагани учун келиб чиққан танқидларга ўз муносабатини билдирди.
3 июль куни “Ливерпуль” ҳужумчиси Диогу Жота укаси Андре Силва билан бирга Испания ҳудудидаги йўл-транспорт ҳодисаси оқибатида ҳалок бўлганди. Бу фожеа нафақат португал футболи, балки бутун жамоатчиликни ларзага солган эди.
Шунга қарамай, Роналду марҳум жамоадошини охирги манзилга кузатиш маросимига бормади. Бу қарор кўплаб мухлислар ва журналистлар томонидан кескин баҳоланди. Аммо афсонанинг ўзи бу ҳақда сўз очиб, танқидларга сабаб бўлган воқеликка ойдинлик киритди.
“Иккита сабаб бор. Мен ҳақимда гапирган танқидчиларни тушунаман, лекин бу менга таъсир қилмайди. Чунки мен ўзимни биламан. Отам вафот этганида ҳам мен қабристонга бормаганман. Мен учун бу — шахсий масала. Шундай жойлар менга оғир таъсир қилади”, — деди Роналду.
Унинг сўзларига кўра, дафн маросимида иштирок этиши вазиятни янада шов-шувга айлантирган бўларди.
“Қаерга борсам, менинг ҳар бир ҳаракатим камерага олинади. Бу фақат фожиани эмас, балки шоуни ҳам пайдо қилади. Мен шоунинг бир қисми бўлишни хоҳламайман. Бу вақтда одамлар марҳум ҳақида ўйлаши керак, мен ҳақимда эмас”, — деди у BBC орқали берган интервьюсида.
Роналду танқидлардан безмаганини, фақат ўзини самимий ҳис қилган қарорни қабул қилганини таъкидлади.
“Мен Жотанинг оиласи ҳақида ўйлаб иш тутдим. Уларнинг оғриғига шоу аралашишини истамадим. Мен уларни ҳурмат қиламан ва бу мен учун муҳимроқ эди. Агар борганимда, бутун дунё камерасини ўша ерга қаратарди. Бу эса муҳаббат эмас, цирк бўларди”, — дея қўшимча қилди у.
Роналду ўз ҳаётидаги шундай вазиятларнинг илгари ҳам бўлганини эслаб ўтди: “Отамни йўқотганимда ҳам мен қабрига бормадим. Бу менинг усулим. Ҳар кимнинг азани ифода этиш тарзи бор. Мен шунчалик кўп нарсани кўрганманки, баъзан сукут — энг тўғри жавоб”.
Португалия матбуоти ёзишича, Криштиану Роналду Жотанинг оиласи билан шахсан алоқага чиққан ва уларга чуқур таъзия билдирган.
Шу тариқа, Роналду нафақат журналистлар, балки жамоатчиликка ҳам ўз қарорини очиқ баён қилди — унингча, муҳим нарса кўз-ўнгидаги шоу эмас, инсоннинг самимий ҳисси ва ҳурмати.
Мухлислар орасида эса турли фикрлар мавжуд: кимдир Роналдуни тушунаётган бўлса, бошқалар унинг бормаслигини нотўғри деб ҳисобламоқда. Бироқ айни ҳолатда футбол юлдузининг фикри аниқ — у саҳнада эмас, ҳақиқий эҳтиромни ифода этмоқчи бўлган.
“Zamin”ни Telegram'да ўқинг!
