Украина президенти Владимир Зеленский Россиянинг тунги дрон ҳужумлари фонида мамлакатнинг ҳаво мудофааси ва халқаро ёрдам масалалари ҳақида сўз очди. Унинг таъкидлашича, Киев ҳозирги пайтда Европа Иттифоқи ва Британия билан ҳамкорликда ҳаракат қилмоқда, аммо ҳалигача украин шаҳарлари устида ҳаво патрули ташкил этиш учун хорижий ҳарбий самолётлар юборилмаган.
Зеленскийнинг сўзларига кўра, Британия ва бошқа иттифоқчилар Киевнинг узоқ вақтдан буён сўраб келаётган ҳаво ҳимоя ёрдамини амалга оширишга ҳали қарор қилмаган. «ЕИ ёрдами ҳеч қачон етарли эмас — уруш тугаганда етади. Путин тўхташга мажбур бўлганини англаган вақтдагина биз буни ҳис қиламиз», — деди у The Guardian нашрига берган интервьюсида.
Украина раҳбари Британия бош вазири Кир Стармер билан муносабатлари илиқ эканини таъкидлаб, ёрдам ҳажмининг чеклангани шахсан Стармер билан боғлиқ эмаслигини қайд этди. Шу билан бирга, Зеленский Европа давлатларининг эҳтиёткорона позициясини танқид қилди: «Лидерлар ўз жамиятларидан қўрқади. Улар урушга чалғишни истамайди. Аммо қўшин юбориш масаласи – ҳар бир давлатнинг шахсий қарори», — деди у.
Президент сўзларига кўра, агар Киев иттифоқчиларга ҳаддан ташқари босим ўтказса, бу Украина учун молиявий ва ҳарбий ёрдамнинг қисқаришига сабаб бўлиши мумкин. «Биз керакли ёрдамни талаб қилмоқдамиз, аммо ҳамкорлар билан муносабатларни ҳам эҳтиёткорона сақлашимиз керак», — деди Зеленский.
У суҳбат давомида Россия Европанинг бошқа давлатларига қарши ҳам «иккинчи фронт» очиши мумкинлигини билдирди. Унинг фикрича, Полша ҳудуди яқинида, шунингдек Брюссель, Копенҳаген ва Мюнхен атрофида кузатилган ноаниқ дронлар Москва томонидан янги ҳужумларни синовдан ўтказиш эҳтимолини англатади.
8 ноябрь куни Украинадаги йирик электр энергетика корхоналаридан бири — “Центрэнерго” Россиянинг тунги ҳаво зарбасидан сўнг ўз фаолиятини тўхтатганини маълум қилди. Орадан бир кун ўтгач, мамлакатнинг бир нечта ҳудудларида вақтинчалик электр узилишлари қайд этилди. The Guardian журналистларининг хабар беришича, Зеленский билан Киевдаги Мариинский саройида бўлиб ўтган интервью пайтида ҳам чироқ икки марта ўчган. Президент бу ҳолатни “одатий ҳаёт” сифатида изоҳлади: «Бизда ҳаёт шундай. Электр ўчади, лекин биз яшаймиз ва курашамиз», — деди у.
Шу билан бирга, Зеленский Германия ва шахсан канцлер Фридрих Мерцга АҚШ ишлаб чиқарган Patriot ҳаво мудофаа тизимини етказиб бергани учун миннатдорлик билдирди. Бироқ, неча комплекс ва қайси ҳисобдан берилгани ҳақида аниқ маълумот ошкор этилмаган. DW’нинг ёзишича, Германия Мудофаа вазирлиги Пентагон билан келишув асосида 2025 йил июлда Украинага яна иккита Patriot тизими жўнатишни режалаштирганини тасдиқлаган.
Украина ҳозирда Россиянинг хаво ҳужумларига қарши курашишда асосий эътиборни Европадан келаётган қурол-яроғ, ҳаво мудофаа тизимлари ва энергетика инфратузилмасини муҳофаза қилишга қаратган. Зеленскийнинг сўзларига кўра, уруш тугаши учун Украина эмас, Россия қарор қабул қилиши лозим — ва буни англашга Путинни фақат куч ва бирдамлик мажбур қила олади.
“Zamin”ни Telegram'да ўқинг!
