Россияликларнинг жорий кайфияти ва урушга муносабатига бағишланган навбатдаги сўровнома жамоатчилик орасида катта муҳокамага сабаб бўлди. “Хроники” тадқиқот лойиҳаси 2025 йил октябр ойида ўтказган сўров натижалари шундан дарак берадики, россияликларнинг аксарияти — тахминан 63–64 фоизи — урушни тўхтатиш ва Украина билан “музокара асосидаги тинчлик шартномаси” имзоланишини истайди. Бироқ шу пайтнинг ўзида фақат 36 фоиз одам бундай натижа амалга ошишига ишонч билдирган.
Тадқиқотда қатнашганлар икки гуруҳга бўлинган: бир қисми ҳукуматдан қайси қарорларни кутаётгани ҳақида фикр билдирган, бошқалари эса ўзлари шахсан Россияда қандай ўзгаришлар бўлишини хоҳлашини айтган. Қатнашчилар кўзни қувонтирувчи “эҳтимолий” қадамлар ичида армия харажатларининг оширилиши (78 фоиз), ички ижтимоий муаммоларга эътибор кучайтирилиши (48 фоиз), Кремл эълон қилган мақсадлар амалга ошгач, урушни тўхтатиш (47 фоиз) каби таклифлар юқори ўринларни эгаллаган.
Шу билан бирга, тинчлик шартномаси тузилишига эҳтимол сифатида 36 фоиз ишонган бўлса, 35 фоиз сафарбарлик бўлиши мумкинлигини айтган. Ғарб билан муносабатларни тиклаш (28 фоиз) ва санкцияларни бекор қилиш (22 фоиз) эса пастроқ эҳтимол сифатида кўрилган.
Қизиғи шундаки, россияликлар энг кўп истайдиган ўзгаришлар билан улар кутган воқелик ўртасида катта фарқ бор. Энг кўп хоҳланган қадамлар орасида урушни тугатиш ва ички муаммоларни ҳал қилиш 88 фоиздан жой олган. Шундан кейин тинчлик шартномасига эришиш (64 фоиз), санкцияларни бекор қилиш (63 фоиз) ва ғарб билан муносабатларни тиклаш (58 фоиз) келади. Армия харажатларини оширишни эса 49 фоиз, сафарбарликни 16 фоиз одам маъқуллаган.
Сўровда урушни қўллаб-қувватлаш даражаси ҳам ўрганилган. Жавобларнинг 50 фоизи урушни маъқуллаганини айтган бўлса, 39 фоизи бу саволга жавоб беришдан қочган. Фақат кичик қисмгина урушни қўллаб-қувватламаслигини билдирган.
Урушда иштирок этиш масаласида эса респондентлар бир-биридан кескин фарқ қилган: 28 фоиз “буйруқ бўлса, қатнашаман” деган, 9 фоиз ихтиёрий боришга тайёрлигини айтган. 38 фоиз бу қарорга қарши турган, 19 фоиз жавоб беришдан воз кечган. 6 фоиз эса сафарбарлик тоифасига кирмаслигини маълум қилган.
Оила аъзоси шартнома асосида фронтга боришни истаса, 55 фоиз респондент буни маъқулламасликларини айтган, 30 фоиз бу қарорни қўллаб-қувватлаган, қолган 15 фоиз эса фикр билдиришдан қочган.
Сўров натижалари россияликлар орасида тинчликка интилиш кескин кучайганини кўрсатади. Бироқ уларнинг аксарияти ҳукумат шундай йўлни танлашига ҳозирча ишонмаяпти — умид билан реал кутилмалар орасида жиддий тафовут сақланиб турибди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
