Украина президенти Володимир Зеленский охирги кунларда АҚШнинг тинчлик режаси атрофида юз бораётган босимлар фонида халққа мурожаат қилди. Президент мурожаатида мамлакат ҳозир тарихидаги энг мураккаб, энг танқидий босқичлардан бирида турганини таъкидлади.
Унинг айтишича, Украина олдида бир нечта оғир ва масъулиятли танловлар турибди: қадр-қимматдан воз кечиш ёки стратегик ҳамкордан айрилиш хавфи, 28 банддан иборат мураккаб режани қабул қилиш ёки қаҳратон қиш ҳамда бошқа таҳдидлар билан юзма-юз келиш эҳтимоли. Зеленскийга кўра, ҳозир Вашингтондан қиррали ва босимли сигналлар келмоқда — Украинага ҳужум қилганларга яна ишониш сўралаётгани эса алоҳида қийин қарорлар талаб қилади.
Президент шундай деди:
«Биз ўзимизни хотиржам тутаётгандек кўринамиз, аммо амалий ишларни ҳам шиддат билан олиб бораяпмиз. Америкалик ҳамкорлар билан музокаралар кучайтирилмоқда — шунда душман “Украина тинчликни истамаяпти” деб баҳона топмаслиги керак. Мен тинчлик режасида икки муҳим масала – халқимизнинг қадр-қиммати ва эркинлиги инобатга олиниши учун курашаман. Уруш тўхтасин, лекин Украина ҳам, Европа ҳам, жаҳон ҳам йиқилмасин».
Зеленский, шунингдек, Украина армияси деярли тўрт йилдан бери дунёдаги энг кучли ҳарбий тузилмалардан бирини тўхтатиб турганини эслаб ўтди. Халқ урушдан чарчаган, барча барқарор тинчликни истайди. Аммо президентга кўра, энг мустаҳкам металл ҳам узоқ босимга чидай олмайди — шу боис ички бирдамлик ҳозирги жараёнда ҳал қилувчи аҳамият касб этади.
«Россия учун энг қўрқинчлиси — украинларнинг бирлиги. Тинчликка эришиш учун узил-кесил яқинлашган пайтда халқимнинг қўллаб-қувватлаши мен учун беқиёс. Сиёсатчилар, фуқаролар, барчамиз ўзаро жанжални тўхтатишимиз ва бешта-ўнта сиёсий ўйинга берилмаслигимиз керак. Мен халқим ёнимда турганига ишонаман», — деди Зеленский.
Унинг таъкидлашича, келаётган ҳафта Украина учун имтиҳонли бўлади: ташқи босимлар, миллат ичида ихтилоф чиқаришга қаратилган уринишлар ва манипуляциялар кўпайиши кутилмоқда. Президент бундай шароитда жамият янада бирлашиши, душманнинг режасига йўл очмаслиги кераклигини таъкидлади.
Мурожаат якунида Зеленский яна бир бор шундай деди:
«Биз тинчлигимиз, қадр-қимматимиз ва эркинлигимизни муҳофаза қилиш учун бирдамликда бўлишимиз шарт. Мен ёлғиз эмаслигимни биламан — Украина халқи ҳар доим менинг ортимда турган».
Меҳмон гуруҳидаги фойдаланувчилар ушбу мақолага изоҳ қолдира олмайди.
