АҚШ президенти Дональд Трамп Оқ уйда журналистлар билан суҳбат давомида Украинадаги уруш тақдири Киевнинг қарорларига боғлиқлигини очиқ баён қилди. Унинг таъкидлашича, Вашингтон томонидан Украина раҳбариятига тақдим этилган янги «тинчлик режаси» — бу фронтдаги тўқнашувларни тўхтатиш учун камдан-кам учрайдиган имкониятдир. Трампнинг фикрича, Зеленский ушбу таклифни рад этса, уруш ўз авжи билан давом этаверади.
Президентнинг қатъий баёнотига кўра, ҳар қандай музокарада тарафларнинг имкониятлари ҳал қилувчи аҳамиятга эга. «Яқинда унга шу ерда, Овал кабинетида очиқ айтганман: “Сенда карталар йўқ”,» — деди Трамп, Украина мавқеининг заифлашганини уқтирган ҳолда. Унга кўра, Киев ахборот ва ҳарбий жиҳатдан оғир босим остида қолган, айниқса қиш мавсуми келиши билан иқтисодий ва энергетик инқироз янада чуқурлашиши мумкин.
Трамп Украина энергетика тизимига бир неча бор амалга оширилган оммавий ҳужумлар шиддатини эслаб ўтди. Унинг фикрича, яқинлашиб келаётган қаттиқ қиш Киевни исталмаган бўлса-да, кескин сиёсий қарорларни қабул қилишга мажбур этиши мумкин. «Ҳар қандай ҳолатда, Зеленский барибир танлов олдида қолади», — деди АҚШ раҳбари.
Бу орада айрим халқаро нашрлар Трамп ва Зеленский яқин кунларда учрашиши мумкинлигини ёзмоқда. Унга кўра, икки давлат раҳбарлари айнан «тинчлик режаси»нинг асосий бандлари бўйича музокараларни давом эттириши кутилмоқда. Reuters агентлиги эса АҚШ расмийлари Киевни келишувга рози қилиш мақсадида қурол-яроғ ва разведка маълумотларини етказиб беришни вақтинча тўхтатиш эҳтимолини тилга олганини хабар қилди.
Яқин вақт ичида Киевнинг қандай йўл танлаши Украина уруши динамикасига бевосита таъсир кўрсатиши мумкин. Вашингтоннинг «сўнгги имконияти» сифатида кўрилаётган ушбу ташаббус Европа хавфсизлик манзарасининг кейинги босқичини белгилаб бериши турган гап.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
