АҚШ президенти Доналд Трамп ҳарбий хизматчиларни ғайриқонуний буйруқларни бажаришдан бош тортишга ундагани ортидан мухолиф Демократик партиянинг олти нафар конгресс вакилига қарши кескин таҳдидли баёнотлар билан яна бир бор майдонга чиқди.
Трампнинг кескин риторикаси
"Менинг буйруқларимни бажармасликка чақирган ана ўша давлатга хиёнат қилганлар ҳозир қамоқда ўтириши керак эди, эркин юриш ўрнига фейк янгиликлар каналларида айтган гаплари йўл қўйиш мумкин бўлган ҳаракат бўлганини тушунтиришга уриниши керак эмас," — деб ёзди у шанба, 22 ноябр куни кечқурун Truth Social ижтимоий тармоғидаги саҳифасида. Президент сиёсатчиларни «энг юқори даражадаги низо чиқариш»да айблади. Унинг сўзларига кўра, уларнинг баёноти «бошқа ҳеч қандай талқинга имкон қолдирмайди».
Бундан аввал, пайшанба куни, Трамп уларни «ўлим билан жазоланадиган хулқ-атвор»да айблаб, ўлим жазоси билан очиқчасига қўрқитган эди.
Конгресс аъзоларининг мурожаати
Илгари ҳарбий ёки махсус хизматлар тизимида фаолият юритган уч аёл ва уч эркакдан иборат ушбу гуруҳ видеомурожаат эълон қилган. Унда амалдор ҳарбий хизматчилар ва разведка ходимларини «қонунга зид буйруқларни» бажармасликка чақирилган. Улар мисол сифатида Лос-Анжелесда намойишчиларга қарши — Трампнинг қўшинлар олий бош қўмондони сифатидаги буйруғи билан — қўшинларни қўллаш мисолини кўрсатди. Шунингдек, АҚШ қуролли кучлари томонидан Лотин Америкаси қирғоқлари яқинида гиёҳванд модда ташувчиларни ўлдириш амалиётлари ҳам қаттиқ қораланди.
Бу қўшма чақириқни МРБда ишлаган сенатор Элисса Слоткин, денгиз кучларида хизмат қилган ва астронавт бўлган сенатор Марк Келли ҳамда Вакиллар палатасининг бир нечта аъзоси имзолаган.
Сиёсий зўравонлик хавфи
Демократик партия Трамп таҳдидларини «мутлақо нафратли» деб атади ва АҚШда сиёсий агрессиянинг янги тўлқини юзага келишидан огоҳлантиришди. Мамлакатдаги сиёсий вазият ҳануз жуда таранг ва нотинчлигича давом этмоқда. Сўнгги ойларда Юта штатида ўта ўнг қарашларга эга инфлюенсер отиб ўлдирилган, июнда демократик партия вакили ўз уйида ўлдирилган.
АҚШ Конституциясига кўра, кимки Қўшма Штатларга қарши уруш олиб борса ёки мамлакат душманларига ёрдам берса, бу давлатга хиёнат қилган ҳисобланади. Давлатга хиёнат учун ўлим жазоси, қамоқ ёки жарима тайинланиши мумкин. Трампнинг бу каби қўрқитувлари федерал қонунларни эслатиб, жамиятдаги бўлинишни янада чуқурлаштирмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
