Россия ва Украина ўртасидаги низога барҳам беришга доир АҚШ режаси Женевадаги музокараларда тубдан ўзгартирилди. "Financial Times" нашрининг музокаралар ҳақида маълумотга эга манбаларига кўра, ҳужжат 28 банддан 19 бандгача қисқартирилди. Бу Киев ва унинг Европалик иттифоқчилари бир қатор талабларнинг номақбуллигини билдирганидан сўнг юз берди.
Хусусан, Украина армия сонини чеклаш ва Донбассни топшириш каби ҳудудий ён беришлар бўйича ўзининг музокараларнинг асосий шартларини белгилаб берган эди. Европа буни қўллаб-қувватлади, шунингдек, музлатилган Россия активлари бўйича қарор қабул қилиш ва санкцияларни бекор қилиш масаласида ўзининг мустақил қарор қабул қилиш ҳуқуқини урғулади. Украина президенти девони раҳбари маслаҳатчиси Олександр Бевз "28 бандли тинчлик режаси энди мавжуд эмас," деб тасдиқлади ва "Киевнинг бирорта эътирози инобатга олинмаган," деди.
АҚШ Давлат котиби Марко Рубио муаммога ечим топиш йўлида "катта" ютуқларга эришилганини таъкидлади. Унинг сўзларига кўра, режа ҳали пухталаниши керак, бироқ "мақбул муддатларда" келишувга эришиш учун асослар бор. Томонлар келажакдаги ҳар қандай келишув Украина суверенитетини қўллаб-қувватлаши кераклигига келишиб олдилар. Якуний матнни АҚШ президенти Доналд Трамп ва Украина президенти Володимир Зеленский тасдиқлаши керак, шундан сўнг ҳужжат Москвага юборилади.
Трампнинг ўзи 24 ноябрь куни: "Ростдан ҳам Россия ва Украина ўртасидаги тинчлик музокараларида жиддий ўзгариш рўй бериши мумкинми???" деб ёзди, яхши нарса содир бўлиши мумкинлигини кўрсатди. Европа давлатлари эса келгуси ҳафтада Франция, Германия ва Буюк Британия иштирокида навбатдаги учрашувларни кутмоқда. Дипломатлардан бирининг айтишича, улар "ҳаётий бўлган альтернатив таклиф тайёрлашга уринмоқдалар". Европалик амалдорлар, агар натижага эришилмаса, Трампнинг Украинани қўллаб-қувватлашни бутунлай тўхтатиши мумкинлиги эҳтимоли борлигини қайд этишди. Кремль матбуот котиби Дмитрий Песков эса Москва АҚШдан Женевадаги музокаралар ҳақида расмий маълумот олмаганлигини билдирди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
