Таиландда тобутда тирилган аёл атрофдаги ҳаммани ҳайратга солди

Таиланднинг Нонтҳабури провинциясида жуда ғайриоддий ва одам ишонмайдиган ҳодиса содир бўлди: кремацияга тайёрланган 65 ёшли аёл тобут ичида тирилиб, барчани шок ҳолатига солган. “Al Jazeera” тарқатган маълумотга кўра, аёлга аввал “ўлган” деган нотоғри хулоса қўйилгани кейин маълум бўлган.

Ҳодиса ибодатхона ходимлари тобут ичидаги заиф тақиллаш товушини эшитиб қолганларидан бошланган. Расмийлардан бирининг айтишича:

“Мен улардан тобутни очишни сўрадим ва ҳамма лол қолди. Аёлнинг кўзлари нимагадир очилгандек, ўзи тобутни тақиллатaётган эди. Балки у анча вақт шундай ётгандир”, — деб вазиятни тушунтирган.

Аёлнинг акаси таъкидлашича, синглиси икки йил давомида оғир ҳолатда тўшакда ётган, соғлиғи кескин ёмонлашган ва икки кун аввал у нафас олмаётгандек кўринган. Шу боис уни тобутга жойлаб, Бангкокдаги шифохонага донорлик учун олиб борган. Аммо ўлим ҳақидаги расмий гувоҳнома бўлмагани сабабли шифохона донорликка рози бўлмаган.

Шундан кейин аёл ибодатхонага олиб келинган, бироқ ҳужжатлар йўқлиги боис бу ерда ҳам кремация амалга оширилмаган. Ибодатхона ходими марҳумнинг қариндошига ўлим гувоҳномасини олиш тартибини тушунтираётган пайтда, тобут ичидан яна тақиллаш овози эшитилган ва вазият бутунлай ўзгарган.

Аёл дарҳол шифохонага етказилган. Шифокорлар унга оғир гипогликемия — яъни қондаги қанд миқдорининг кескин тушиб кетиши ташхисини қўйишган. Аниқланишича, аёлнинг юрак ва нафас олиш жараёни аслида тўхтамаган, фақат ташқи белгилар ўлимга ўхшаб кўринган.

Маълумотларга кўра, ибодатхона аёлнинг барча тиббий харажатларини ўз зиммасига олган.