Ҳонгконгда чоршанба кунги тушдан кейин кескин бошланган ёнғин бир неча дақиқа ичида улкан фавқулодда вазиятга айланиб, бутун шаҳарни ҳушёрликка чорлади. Аввало бамбукдан барпо этилган қурилиш ҳавозалари тутантирилган, сўнгра аланга баланд қаватли биноларнинг ташқи қисмлари орқали жуда тез тарқалгани айтилмоқда. Мутахассислар айтишича, ёнғин камида саккизта иморатдан бештасини тўлиқ ёки қисман ўз домига олган.
Бу мажмуада тахминан 4,5–4,8 минг киши истиқомат қилиши инобатга олинса, ҳодиса кўлами ва хавф даражаси янада ошади. Афсуски, ҳалок бўлганлар орасида ўз хизмат бурчини адо этишга уриниб, олов ичида йўқолиб қолган бир ўт ўчирувчи ҳам бор. Унинг жамоаси билан алоқаси маълум бир вақтда узилган, кейин эса оғир куйиш жароҳатлари билан топилган. Қолаверса, ўнлаб фуқаролар тан жароҳати олган, улардан 40–60 нафари оғир аҳволда экани қайд этилмоқда.
Ҳокимият бу фожеага шаҳардаги энг юқори — бешинчи даражали хавф тоифасини берди. Ҳонгконгда бундай белги охирги бор 2008 йилда қўлланган эди. Мутасаддилар бу ҳодисани сўнгги ўн йилликлардаги энг ҳалокатли ёнғинлардан бири сифатида тилга олишмоқда.
Расмий хулоса ҳозирча шаклланмаган. Бироқ аланганинг бамбук ҳавозалари ва ташқи фасад материаллари орқали ғайриоддий тез суръатда ёйилгани урғу билан қайд этилаяпти. Маҳаллий оммавий ахборот воситаларига кўра, айрим аҳоли ҳодисадан олдин қурилиш ишчилари чекаётгани, хавфсизлик қоидаларига бепарволик муносабати ҳақида бир неча марта шикоят билдирган. Полиция уч нафар эркакни ушбу ёнғинга алоқадорликда гумон қилиб ҳибсга олган.
Ҳонгконг аҳоли энг зич тўпланган мегаполислардан бири, юзлаб осмонўпар бинолардан иборат. Илгарилари ҳалокатли ёнғинлар кўп учраган бўлса-да, охирги ўн йилликларда хавфсизлик нормаларининг кучайтирилиши бу каби фожиаларни анча қисқартирган эди. Аммо бугунги воқеа яна бир бор қурилиш ишларидаги назорат, ёнғин хавфсизлиги стандартлари ва шаҳар инфратузилмасидаги камчиликларни кун тартибига қайтармоқда.
Маҳаллий фуқаролар ва экспертлар бу воқеадан кейин хавфсизлик тизимини янада қатъий ислоҳ қилиш, айниқса реконструкция жараёнларида бамбукли ҳавозалардан фойдаланиш масаласини қайта кўриб чиқишни талаб қилмоқда. Шаҳар эса ҳали ҳам йирик ёнғинлар билан боғлиқ xaвф-хатарлардан бутунлай ҳимояланган эмаслигини яна бир бор ҳис қилди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
