Россиянинг айрим минтақаларида, хусусан, Ростов шаҳрида, меҳнат мигрантларини фронтга жалб қилишнинг янгича найранги пайдо бўлди. Шаҳарда ишлаб келаётган ҳамюртимиз Kun.uz'га мурожаат қилиб, патент расмийлаштириш вақтида мигрантлардан махфий равишда ҳарбий контракт билан боғлиқ ҳужжатларга имзо қўйдирилаётганини маълум қилди. Бу мигрантларнинг ҳуқуқларини бузишга қаратилган тизимли босимдан далолат беради.
Ёпиқ эшиклар ортидаги мажбурлаш
Юртдошимиз патентни янгилаш учун рўйхатдан ўтишга борганида мутлақо кутилмаган вазиятга тушганини баён қилди. "Олдимга бир нечта ҳужжат қўйишди. Орасида урушга чақирув мазмунидаги қоғозлар ҳам бор экан", — дейди у. Айнан ўша қоғозда Россия Қуролли кучлари билан шартнома тузиш тартиби ва имтиёзлари билан танишгани тасдиқланиши талаб қилинган.
У буни рад этганидан сўнг, ҳужжатларни берган ходима паспорт стол раҳбарини чақирган. Раҳбар келиб, "имзо қўйинг, бу шунчаки таништириш, биздан талаб қилишяпти", деб тазйиқ ўтказмоқчи бўлган. Ҳамюртимиз рози бўлмагач, унга ишлаб ва яшаб турган жойи бўлишига қарамай, рўйхатдан ўтказа олмасликларини айтиб, чиқариб юборишган.
Хавфли шошқалоқлик
Энг катта хавф шундаки, кўпгина муҳожирлар ҳужжатларни эътибор билан ўқиб чиқмайди, рус тилини яхши билмайди ёки тезроқ патент олиш учун шошиб, ўйламай туриб имзо қўйиб юборади. Натижада, улар билмасдан ҳарбий хизматга розилик бериб юборишади.
Аслида, миграция марказларининг бундай босим ўтказиши қонунга хилоф, чунки ҳарбий хизматга оид ҳужжатлар патент учун талаб қилинмайди. Бу мигрантлар ҳуқуқларининг очиқдан-очиқ бузилишидир.
Юртдошларимизга бундай ҳолатларда сабрли бўлиш, ҳар бир қоғозни синчиклаб ўқиб чиқиш ва урушга оид ҳужжатларни рад этиш тавсия қилинади. Агар босим кучайса, зудлик билан ҳуқуқни муҳофаза қилиш органлари ёки Консулликка мурожаат қилиш энг тўғри йўлдир.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
