Visual Capitalist портали АҚШ Геология хизмати (USGS) маълумотларига асосланиб, жаҳонда мавжуд бўлган ноёб ер элементлари (НЕЭ) захиралари қаерда жойлашганини кўрсатди. Инфографикада бу ресурсларнинг саноқли давлатлар ихтиёрида номутаносиб тарзда тўплангани алоҳида кўрсатилган. Бу элементлар замонавий технологиялар ва мудофаа саноати учун асосий хом ашё ҳисобланади.
Пекиннинг мутлақ устунлиги
Тақсимотдаги энг катта номутаносиблик Хитойда. Пекин 44 миллион тонна билан пешқадамлик қилмоқда — бу жаҳондаги умумий 91,9 миллион тоннали захираларнинг қарийб ярмини ташкил этади. Бразилия эса 21 миллион тонна (23%) билан мустаҳкам равишда иккинчи поғонани эгаллайди, лекин у ердаги йирик конларнинг кўп қисми ҳали ўзлаштиришнинг дастлабки босқичларида турибди.
АҚШнинг стратегик ожизлиги
Ҳиндистон (6,9 млн т), Австралия (5,7 млн т), Россия (3,8 млн т) ва Ветнам (3,5 млн т) каби давлатлар захиралар ҳажми бўйича АҚШдан олдинда туради. Жами олтита етакчи мамлакат барча маълум захираларнинг тахминан 80 фоизини назорат қилмоқда. Қўшма Штатлар эса атиги 1,9 миллион тонна (2%) НЕЭ захирасига эга. Бу рақамлар АҚШнинг импорт ва қайта ишлаш занжирларига қаттиқ қарамлигини яна бир бор исботлайди.
Американинг жавоби
Сўнгги ойларда Трамп маъмурияти АҚШнинг Хитой етказиб берувчиларига қарамликни пасайтиришга интилмоқда. Бу мақсадга эришиш учун миллий кончилик лойиҳаларини молиялаштириш, рухсатномалар бериш жараёнини тезлаштириш ва таъминот занжирларини турли йўллар билан диверсификация қилиш орқали иттифоқчи давлатлар билан ҳамкорликни кучайтириш чоралари кўрилмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
