Жаҳон сиёсатини ларзага солувчи хабар: The Telegraph нашрининг ёзишича, Дональд Трамп маъмурияти Кремлни сулҳга кўндириш учун Қрим ва Украинанинг бошқа босиб олинган ерларини Россия таркибида тан олишга тайёрланяпти. Бу таклиф билан Трамп ўзининг махсус вакили Стив Уиткофф ва куёви Жаред Кушнерни Москвага жўнатмоқда.
Путиннинг талаби ва АҚШнинг Европага эътиборсизлиги
Маълумотларга кўра, америкаликларда Европанинг позициясига эътиборсизлик кучаймоқда ва улар "европаликлар хоҳлаган ишини қилиши мумкин", деб ҳисобламоқда. Бир кун аввал Владимир Путин ҳам бу борада фикр билдирган эди: Вашингтон Қрим, Донецк ва Луганск вилоятларини Россия ҳудуди сифатида қонуний тан олиши тинчлик музокараларининг марказий мавзуси бўлишини айтган.
Стив Уиткофф Путин элчиси Кирилл Дмитриев билан ҳамкорликда тузган дастлабки тинчлик режасида АҚШ Қрим ва Донбасс минтақалари устидан Россия суверенитетини «амалда» тан олиши ҳақида банд бор эди. Гарчи ҳужжатга тузатиш киритилган бўлса-да, босиб олинган ҳудудларни Россияга тегишли деб тан олиш Оқ уйнинг асосий стратегиясининг узвий қисми бўлиб қолиши мумкин. Аммо Киевни бу назоратни тан олишга мажбур қилишмайди, деб алоҳида қайд этилган.
Европарламентнинг кескин қаршилиги
Айни пайтда, бу режа кеча қабул қилинган Европа парламенти резолюциясига бутунлай зид. Европарламент, ЕИ давлатлари Украинанинг босиб олинган ҳудудларини ҳеч қачон тан олмаслиги ҳақида огоҳлантирди. Резолюцияда Трампнинг «тинчлик режаси» сулҳнинг яқинлашишига фақат тўсқинлик қилаётгани очиқчасига қайд этилган. Бу эса Ғарбдаги геосиёсий ёрилишнинг чуқурлашаётганидан далолат беради.
“Zamin”ни Telegram'да ўқинг!
