Россия қўшинлари шанбага ўтар кечаси яна Украина ҳудудлари бўйлаб оммавий зарбаларни амалга оширди. Маҳаллий расмийларнинг маълум қилишича, учувчисиз қурилмалар ва авиабомбалар орқали амалга оширилган асосий ҳужумлар Киев ва унинг вилоятига қаратилган. Шунингдек, Днипро ва Харкив шаҳарларида ҳам кучли портлашлар қайд этилган.
Киевда турар жойлар нишонга олинди
Киев шаҳар ҳарбий маъмуриятининг хабар беришича, дронлар пойтахтнинг камида тўрт туманидаги турар жой биноларига келиб тушган. Шевченко ва Соломён туманларида 14 ва 25 қаватли уйлар, хусусий сектор ва автомобиллар шикастланиб, ёнғинлар келиб чиққан. Киев мэри камида етти киши, жумладан 13 ёшли ўсмир жароҳатланганини билдирди. Бровар туманида ҳам икки киши жабрланган.
Ҳужумдан олдинроқ Украина Ҳаво кучлари Харкив бўйича зарбалар ҳақида хабар берган, унда бошқариладиган бомбалар қўлланган. Кейинроқ Харкив вилоятидаги Дергачёв тумани маъмурияти раҳбари зарбалар энергетика инфратузилмасига ҳам зарар етказганини тасдиқлади.
Тинчлик режаси ва Путиннинг шарти
Шундай оғир ҳужумлар фонида, ноябр ўрталарида АҚШ президенти Доналд Трампнинг тинчлик режаси ҳақида хабарлар тарқалди. Дастлаб Москва талабларига яқин бўлган бу режага Украина ва АҚШ Женевада ўтказган маслаҳатшувлардан сўнг ўзгартиришлар киритилди. Кутилишича, янгиланган ҳужжатда Россиянинг ҳудудий масалалари кўтарилмайди ва у декабр бошида Москвага тақдим этилади.
Бунга қарамай, Россия президенти Владимир Путин Украина қуролли кучлари Москва "ўзиники" деб тан олган Донбассдаги позицияларидан чекинмагунча, ҳужумлар давом этишини маълум қилиб, ўз позициясини ўзгартирмаслигини билдирди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
