Шимолий Корея раҳбари Ким Чен Ин мамлакат ҳарбий авиациясининг келажагига оид муҳим баёнот берди. Унинг таъкидлашича, КХДР ҳаво кучлари яқин вақт ичида стратегик аҳамиятга эга бўлган тамоман янги қуроллар билан таъминланади ва бу билан армия зиммасига янада «муҳимроқ вазифа» юкланади.
Корея Марказий ахборот агентлиги тарқатган маълумотга кўра, Ким Чен Ин партия ва давлат раҳбариятининг авиацияга бўлган ишончини алоҳида урғу билан қайд этган. У «Корея Демократик Республикаси ҳаво кучлари стратегик ҳарбий ресурслар билан бойитилиши, шу билан бирга янги, ҳал қилувчи вазифаларни ўз зиммасига олиши» кутилганини таъкидлаган.
Ким Чен Ин бу баёнотни ҳаво кучлари ташкил этилганининг 80 йиллигига бағишланган тадбирда берди. Унинг сўзларига кўра, янги стратегик ресурслар ва махсус технологиялар жорий этилса, КХДР авиацияси мамлакат мудофаа салоҳиятининг энг муҳим таянч устунига айланади.
Шу билан бирга, у ҳаво кучлари эндиликда «ядровий тўсиқда актив рол ўйнаб бораётганини» ҳам эслаб ўтди. Раҳбарнинг фикрига кўра, бу бўлинмалар душман томонидан амалга оширилиши мумкин бўлган барча турдаги жосуслик ҳаракатларига, ҳаводаги таҳдидларга ва эҳтимолий ҳарбий провокацияларга қаттиқ ва қатъий жавоб қайтариши зарур.
Охирги йилларда КХДР ўз ҳарбий дастурини кучайтираётгани, хусусан, ракета технологиялари ва ядровий салоҳиятни кенгайтиришга эътиборни оширгани кузатилмоқда. Ким Чен Иннинг навбатдаги баёноти эса мамлакатнинг ҳарбий авиацияси ҳам стратегик йўналишда янги босқичга кўтарилаётганини кўрсатади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
