Тинчлик марафони: Флорида, Париж ва уч асосий муаммо
Украина президенти Володимир Зеленскийнинг маълум қилишича, Украина, унинг Европа иттифоқчилари ва АҚШ Вашингтон томонидан Россия иштирокида ишлаб чиқилган, сўнгра Женева ва Флоридадаги учрашувлардан кейин ўзгартирилган тинчлик режаси бўйича муҳокама қилинаётганини билдирди. Зеленский музокараларда энг мураккабларидир дея атаган учта асосий масалани санаб ўтди: ҳудудлар масаласи, хавфсизлик кафолатлари ҳамда мудофаа ва тикланиш учун пул ажратилиши.
Душанба куни Зеленский Францияга сафар қилди, якшанба куни эса Украина делегацияси Флоридада АҚШ давлат котиби Марко Рубио, Доналд Трампнинг махсус элчиси Стив Уиткофф ва Жаред Кушнер билан музокаралар ўтказган. Макрон билан биргаликдаги матбуот конференциясида Зеленский тинчлик режасининг якуний версиясини келишиш давом этаётганини таъкидлади. Якшанба кунги маслаҳатлашувлар олти ярим соат давом этган.
Ҳудуд ва молиялаштиришдаги зиддият
"Очиғини айтаман – ҳудудий масала энг мураккаби, – деди у. – Пул ва тикланиш масаласини эса европалик ҳамкорларсиз қабул қилиш осон эмас, чунки пулнинг ўзи Европада. Мен буни тўғри эмас деб ҳисоблайман. Ва хавфсизлик кафолатлари масаласида АҚШ томонидан ҳам, Европа томонидан ҳам аниқлик бўлиши жуда муҳимдир".
ОАВ маълумотларига кўра, режанинг 28 банддан иборат дастлабки версиясида Россиянинг босиб олган ҳудудларини тан олиш, Украина кучларини олиб чиқиб кетиш, шунингдек, санкцияларни олиб ташлаш ва уруш жиноятчиларини афв этиш назарда тутилган. Киев бунга қарши чиққан. "Биз Россия бу уруш учун тақдирлаш деб билмаслигини кафолатлашимиз керак. Тажовузкор тажовуз учун пул тўлаши керак", – дея қатъий таъкидлади Зеленский.
Музлатилган активлар ва НАТО кафолатлари
ОАВдаги хабарларга кўра, Женевадаги музокаралардан сўнг, ҳудудлар масаласи ҳужжатдан "алоҳида муҳокамага қолдирилгани" ҳамда Трамп ва Зеленский ўзаро учрашувда кўриб чиқиши учун очиқ қолдирилгани айтилади. Хавфсизлик кафолатлари масаласида НАТО низомининг бешинчи моддасига ўхшаш механизм кўриб чиқилмоқда. Зеленскийнинг сўзларига кўра, Европанинг "кўнгиллилар коалицияси" аъзолари таклифларни тайёрламоқда. "Биз Россиянинг учинчи босқини содир бўлмаслиги кафолатланишини таъминлаш устида ишлаяпмиз", – деди у.
Ғарб давлатлари Россиянинг Европа Иттифоқи ҳудудида музлатилган активларидан мудофаа ва тикланиш учун фойдаланиш имкониятини кўриб чиқмоқда. Лекин Eeuroclear депозитарийси жойлашган Белгия позицияси сабабли якуний қарор ҳали қабул қилинмаган.
Кейинги қадамлар
Зеленский Уиткофф, Макрон, Рустем Умеров ҳамда Буюк Британия бош вазири Кир Стармер билан қўшимча мулоқотлар ўтказганини билдирди. Сешанба куни Уиткофф Москвага сафар қилди. Украина президенти Ирландияга боради, у ерда делегация аъзолари "музокаралар қайси нуқтага етиб келганини босқичма-босқич айтиб беришади". Владимир Путиннинг сўнгги баёнотларига кўра, Россия урушни тўхтатиш шартлари бўйича максималистик талаблардан воз кечмоқчи эмас.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
