Беш соатлик махфий учрашув ва янги режалар
Чоршанба куни тонгда Кремлда Украинадаги урушни тинч йўл билан ҳал этиш бўйича Россия ва АҚШ ўртасидаги музокаралар жараёни ўтказилди. Учрашув қарийб беш соат давом этди ва Тошкент вақти билан тахминан 02:30 да якунланди. Россия томонидан Владимир Путин, унинг ёрдамчиси Юрий Ушаков қатнашган бўлса, АҚШдан президентнинг махсус вакили Стивен Уиткофф ва Доналд Трампнинг куёви Жаред Кушнер иштирок этган.
Путиннинг салбий муносабати ва "катта иш"
Юрий Ушаковнинг маълум қилишича, Москвага АҚШнинг дастлабки «тинчлик режаси»дан ташқари яна тўртта ҳужжат тақдим этилган. Ушаков Владимир Путин Вашингтоннинг қатор таклифларига нисбатан «танқидий, ҳатто салбий муносабатда» эканини яширмаганини айтди. Учрашувда «аниқ ҳудудий масалалар» ҳам муҳокама қилинган.
"Ҳозирча муроса варианти топилмади. Бироқ америкаликлар тайёрлаган айрим таклифлар тўлиқ рад этилмайди, маълум маънода қабул қилиниши мумкин. Демак, иш давом этади", – дея таъкидлади Ушаков.
Шунга қарамай, у делегациялар учрашувини жуда «фойдали, конструктив ва мазмунли» деб атади. "Тинчлик узоқлашмади. Бироқ ҳам Вaшингтонда, ҳам Москвада ҳали жуда катта иш олдинда турибди", – деди у.
Кремлдаги сир ва Киевнинг кутиши
Ушаковнинг алоҳида қайд этишича, суҳбат «бутунлай ёпиқ, махфий» шаклда ўтган ва унинг барча тафсилотлари очиқланмайди. АҚШ вакиллари Трампга «шахсан» ҳисобот беради, шундан сўнг кейинги муҳокамалар учун Москва билан алоқага чиқишади.
Украина президенти Володимир Зеленский эса айни пайтда урушни тугатиш шартлари бўйича «осон ечимлар» кутмаётганини ёзди. Унинг сўзларига кўра, Киев АҚШ делегациясининг Россиядаги музокараларидан кейинги сигналларини кутяпти. «Кейинги ҳаракатлар айнан мана шу маълумотларга боғлиқ бўлади», – деди Зеленский ва Трамп билан учрашув эҳтимолини ҳам рад этмади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
