Украина президенти Володимир Зеленский АҚШ ва Россия делегацияларининг Кремлдаги музокаралари билан айни пайтда халққа ва ҳамкорларга мурожаат қилиб, урушни тугатиш шартлари борасидаги кескин позициясини маълум қилди. Унинг Telegram каналида эълон қилинган ҳамда Европа етакчилари билан ўтказган учрашувларида билдирилган асосий фикрлари қуйидагилардан иборат бўлди:
Енгил ечимлар кутилмаяпти: «Биз тинчликка эришишда осон ечимлар бўлишини кутмаяпмиз. Ҳозирда мураккаб музокаралар жараёни кетмоқда ва Украина ўзининг миллий манфаатлари ҳисобига тинчликка эришмайди. Уруш адолатли якунланиши лозим».
Ҳудудий масала – энг қийини: «Музокаралардаги энг қийин масала — ҳудудий масала бўлиб қолмоқда. Украина халқи ҳеч қачон босиб олинган ерларнинг Россияга ўтишини тан олмайди. Ҳудудий яхлитлик халқаро ҳуқуқнинг асосидир ва бу борада чекинмаймиз».
Хавфсизлик кафолатлари муҳим: «Тинчлик нафақат вақтинчалик ўт очишни тўхтатиш эмас, балки чиндан ҳам мустаҳкам ва узоқ муддатли бўлиши керак. Бунинг учун Ғарб давлатлари томонидан Украинага аниқ ва мустаҳкам хавфсизлик кафолатлари тақдим этилиши керак. НАТОга аъзолик хавфсизлигимизнинг энг арзон кафолати бўлиб қолади».
Европа билан мувофиқлаштириш: «АҚШ режасининг янада такомиллашган кўриниши муҳокама қилинмоқда. Лекин ҳар қандай тинчлик шартномаси Европа ҳамкорларимиз иштирокисиз якунланмайди. Ҳозир Франция, Германия ва бошқа етакчилар билан ҳамкорликда позицияларимизни мувофиқлаштиряпмиз».
АҚШ сигналларини кутиш: «Биз АҚШ делегациясининг Москвадаги мулоқотлардан сўнг бизга юборадиган сигналларини кутяпмиз. Кейинги қадамлар айнан шу маълумотларга боғлиқ бўлади. Мен Дональд Трамп билан учрашувга тайёрман, аммо бу музокаралар натижаларига қараб ҳал бўлади».
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
