Россия президенти Владимир Путин Москвада АҚШ махсус вакили Стив Уиткофф ва Дональд Трампнинг сиёсий маслаҳатчиси Жаред Кушнер билан ўтказилган музокаралар ҳақида биринчи марта батафсил маълумот берди. Унинг айтишича, учрашув жуда узоқ давом этган ва томонлар Трамп таклиф қилган тинчлик режасини ҳар бир бандини алоҳида муҳокама қилишга мажбур бўлган.
Путиннинг таъкидлашича, АҚШ делегацияси Москвага олиб келган тинчлик режаси, асосан, Трамп билан Аляскада эришилган келишувларга асосланган. Америкаликлар ушбу музокараларда 27 банддан иборат тинчлик режасини 4 та алоҳида пакетга бўлиб, ҳар бирини босқичма-босқич муҳокама қилишни таклиф қилган. Москва бу ёндашувни «тушунарли ва амалий» деб атади, аммо натижа борасида ҳали охирги тўхтамга келинмаган.
Россия президенти сўзларига кўра, мамлакат Украинага урушдан воз кечиш учун бир неча таклифлар киритган. Масалан, Киевга Донбассдан қўшинларни олиб чиқиш ва Украинани «ҳужумга ўтмаслик» ҳақида огоҳлантириш, аммо Украина ўзининг ҳарбий йўлни танлаганини таъкидлади. Путин, шунингдек, Россия Донбасс ва Новороссияни ҳар қандай йўл билан, шу жумладан ҳарбий йўл билан ҳам озод қилишига ишонишини билдирди.
Путиннинг баёнотларига кўра, Москва ва АҚШнинг музокаралари "фойдали ва мазмунли" бўлса-да, урушни тўхтатиш бўйича ҳали ҳеч қандай аниқ келишувга эришилмаган. Россия Украинадаги ҳарбий мақсадларидан қайтмоқчи эмас, Трамп орқали АҚШнинг воситачилиги эса ҳали натижага олиб келмади.
Бу жараёнда Россия учун асосий мақсад – Украинадаги қўшинларни ўз шартларига кўра қайтариш ва мамлакатнинг бир қисми бўлган Донбасс ва Новороссияни озод қилишдир.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
