Испанияда етказиб бериш хизматида ишловчи аёл ишга белгиланган вақтдан олдин келгани учун меҳнат шартномасидан маҳрум этилди. Гарчи бу тартиб ва масъулиятдек кўринса-да, компания бундай амални ички низомга зид деб баҳолаган.
Аёлнинг шартномасида иш 07:30 да бошланиши қатъий белгиланган эди. Бироқ у мунтазам равишда 06:45–07:00 оралиғида келиб, ўз сменасини олдин бошлаган. Раҳбарият бу одат навбатчилик тартибига аралашиши, иш жараёнидаги мувозанатни бузиши ва жамоа ичида ноқулайлик юзага келтириши мумкинлигини бир неча бор тушунтирган.
2023 йилда расмий огоҳлантириш берилганига қарамай, ходим эрта келишни давом эттирган. Компания буни интизомга бўйсунмаслик сифатида баҳолаб, аёлни ишдан бўшатишга қарор қилган.
Компания изоҳида таъкидланишича, унинг эрта келиши иш жараёнига фойда бермаган, аксинча вазифалар тақсимотига салбий таъсир кўрсатган.
Аёл бу қарордан норози ҳолда Аликанте ижтимоий судига мурожаат қилди. Бироқ суд иш берувчи томонини қўллаб-қувватлади ва ходим такрорий огоҳлантиришларга қарамай ўз хатти-ҳаракатини тўхтатмаганини қайд этди.
Испанияда меҳнат интизоми ва иш вақти режими қаттиқ назорат қилинади. Шу боис, ҳатто ижобий кўринадиган “эрта келиш” ҳам қонунчилик нуқтаи назаридан интизом бузилиши сифатида баҳоланиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
