АҚШ президенти Доналд Трампнинг Украинада президентлик сайловларини ўтказиш вақти келгани ҳақидаги баёноти Киевда жиддий муҳокамаларга сабаб бўлди. Мазкур чақириққа жавобан Украина раҳбари Володимир Зеленский ахборот воситалари билан мулоқот қилар экан, белгиланган шартлар бажарилса, у яқин ойлар ичида сайлов ўтказишга тайёр эканини билдирди.
Зеленский таъкидлашича, сайловларни фақат хавфсизлик тўлиқ кафолатланган ҳолда ўтказиш мумкин. У овоз бериш жараёни халқ йиғилган жойларда хавфсиз муҳитни таъминлаш учун АҚШ ва Европа давлатларидан амалий ёрдам сўради. Президентнинг фикрича, агар зарур чоралар кўрилса, 60–90 кун ичида сайлов ташкил этиш техник жиҳатдан ҳам мумкин.
Шу билан бирга, Зеленскийнинг иккинчи талаби ҳам катта аҳамиятга эга: ҳарбий ҳолат шароитида сайлов ўтказишнинг ҳуқуқий асоси яратилиши керак. У бу борада зарур қонунларга ўзгартириш киритиш масаласини Олий раданинг депутатларига тақдим этганини маълум қилди. Мавжуд қонунчиликка кўра, Украинада ҳарбий ҳолат давомида сайловлар ўтказиш тақиқланган.
Маълумот ўрнида, Трамп бир кун аввал Украинада “аллақачон янги сайлов ўтказиш вақти келган”ини айтган ва Киев раҳбариятини урушни баҳона қилиб, жараённи кечиктираётганликда айблаганди. Унинг фикрига кўра, украин халқи танловга эга бўлиши шарт ва эҳтимолий натижада Зеленский яна ғалаба қозониши ҳам мумкин. АҚШ раҳбарининг тинчлик режасида ҳам уруш тугагач сайлов ўтказиш банди қайд этилган эди.
Россиянинг тўлиқ кўламли ҳужуми бошланганидан бери Украинада ҳарбий ҳолат амал қилмоқда ва айнан шу сабаб 2024 йилда белгиланган президентлик сайловлари номаълум муҳлатга сурилган. Москва томони бу ҳолатдан Зеленскийни “нолегитим” деб кўрсатиш учун бир неча бор фойдаланган.
Трампнинг Оқ уйга қайтиши ортидан сайлов масаласи яна авж олди. Айримлар бундай сайловларни ўтказишни талаб қилса, Киев бу борада эҳтиёткор позицияда қолмоқда — чунки фронтда вазият оғир, хавфсизлик эса таъминланмаган. Шу билан бирга, Олий раданинг 2025 йилда сайловларга тайёргарлик кўраётгани ҳақидаги хабарлар ҳам расман инкор этилган.
Зеленскийнинг баёнотидан кўринадики, Украина раҳбарияти демократик жараённи тўхтатиб қўйиш ниятида эмас, аммо буни амалга ошириш учун халқаро кафолатлар ва ҳуқуқий асослар зарур.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
