АҚШ президенти Доналд Трамп ҳам Россиядан, ҳам Украинадан "жуда норози" эканини билдириб, улар ўртасидаги ҳарбий можаронинг имкони борича тезроқ тугашини истаётганини маълум қилди. Бу ҳақда 11 декабрь, пайшанба куни Оқ уй матбуот котиби Кэролайн Ливитт баёнот берди.
Трампнинг сабри тугади
Кэролайн Ливиттнинг таъкидлашича, АҚШ раҳбари "фақат учрашув учун ўтказиладиган учрашувлардан" (яъни, самарасиз мулоқотлардан) безор бўлган.
Ливитт: "Энди у гап-сўзларни эмас, ҳаракатларни истайди, бу урушнинг тугашини хоҳлайди. Фақат сўнгги бир неча ҳафта ичида АҚШ маъмурияти россияликлар, украиналиклар ва европаликлар билан 30 соатдан ортиқ вақт сарфлади".
Унинг қўшимча қилишича, АҚШ ҳукумати ҳар икки жанг қилаётган томон билан ишлашни давом эттиради.
Париж учрашуви: АҚШ шарт қўймоқда
13 декабрь куни Парижда Германия, Буюк Британия, Франция ва Украина вакиллари иштирокида муҳим учрашув бўлиб ўтади. АҚШнинг ушбу йиғилишда қатнашиши ёки қатнашмаслиги ҳақидаги саволга Оқ уй матбуот котиби очиқ жавоб берди:
"Агар тинчлик келишувини имзолаш учун реал имконият пайдо бўлса, агар бу учрашувлар Қўшма Штатлар учун шу дам олиш кунларида сарфланган вақтга арзийди, деб ҳис қилсак, унда биз ўз вакилимизни юборамиз".
Германия канцлери Фридрих Мерц аввалроқ Украина қайси ҳудудий имтиёзларга боришга тайёр экани ҳақидаги таклифлар АҚШ президентига етказилганини айтган эди. Трампнинг ўзи эса бу мулоқотда "кескин сўзлар" бўлганини таъкидлади ва "Биз қарорни улар қайси натижа билан қайтиб келишига қараб қабул қиламиз. Биз вақтни бежизга сарф қилмоқчи эмасмиз", — деди.
Зеленский: Икки асосий тортишув нуқтаси
Ўз навбатида, Украина президенти Володимир Зеленский 11 декабрь куни журналистлар билан учрашувда АҚШ билан музокараларда ҳамон тортишувли бўлиб қолаётган икки асосий бандни санаб ўтди:
1. Донецк вилояти ҳудуди ва у билан боғлиқ барча масалалар.
2. Россия қўшинлари томонидан босиб олинган Запорижжя атом электр станциясининг келажакдаги мақоми .
Зеленскийнинг сўзларига кўра, АҚШ Украина Қуролли кучларига улар назоратида қолиб турган Донецк вилояти қисмидаги позициялардан чиқишни ва мамлакат шарқида демилитаризация қилинган махсус иқтисодий зона яратишни таклиф қилмоқда. Шу билан бирга, АҚШ лойиҳасига кўра, Россияга Донецк, Херсон ва Запорижжя вилоятларида қўшин қолдиришга рухсат берилади, аммо Днипропетровск, Харкив ва Суми вилоятларини тарк этиш мажбурияти юкланади.
Украина раҳбари ҳудудга тегишли ҳар қандай имтиёзлар масаласи бутун халқ муҳокамасига қўйилиши кераклигини таъкидлади: "Бу сайлов орқали бўладими ёки референдум орқалими — барибир, бу ҳолда украин халқининг позицияси ифода этилиши керак".
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
