Россия Федерацияси Украина президенти Володимир Зеленскийнинг Донбасс ҳудудида эҳтимолий ён беришлар масаласи бўйича умумхалқ овоз беришини (референдум) ўтказиш ҳақидаги таклифини рад этди. РФ президенти Владимир Путиннинг ташқи сиёсат бўйича маслаҳатчиси Юрий Ушаков 12 декабрь, жума куни "Интерфакс" нашрига берган интервьюсида қатъий позицияни билдирди.
Донбасс – Россия ҳудуди?
Кремль вакилининг баёнотига кўра, Россия учун Донбасс масаласи муҳокама қилинмайди:
Юрий Ушаков: “Бу ҳудуд Россия Федерациясининг ҳудудидир ва у бизнинг маъмуриятларимиз бошқаруви остида бўлади. Эрта ёки кеч. Агар музокара йўли билан бўлмаса, ҳарбий йўл билан бу ҳудуд Россия Федерациясининг тўлиқ назоратига ўтади”.
Аввалроқ, Dpa агентлиги эслатишича, Россия халқаро ҳуқуқ меъёрларини бузган ҳолда Донбасс (Донецк ва Луҳанск вилоятлари) ҳамда Херсон ва Запорижжя вилоятларини конституцияни ўзгартириш йўли билан ўз таркибига ноқонуний қўшиб олган эди.
Зеленский эса бир кун аввал ҳудудий масалаларни фақат Украина халқи (жумладан, референдум орқали) ҳал қилиши мумкинлигини таъкидлаган эди.
Тинчлик режасининг "номақбул" версияси
Юрий Ушаков "Коммерсант"га берган интервьюсида, Зеленскийнинг ҳаракатларидан асосий мақсад АҚШ билан муҳокама қилинаётган тинчлик режасига Россия учун мутлақо қабул қилиб бўлмайдиган қоидаларни киритиш эканини даъво қилди.
Ушаковнинг айтишича, Россия Европа давлатлари раҳбарлари билан муҳокама қилинаётган янги ҳужжатларни ҳали кўрмаган. Бироқ у тинчлик режасининг янги версияси Россия учун аввалгисидан ҳам ёмонроқ ва қабул қилиб бўлмайдиган бўлиб чиқиши мумкинлигидан хавотир билдирди.
У яна бир бор ўт очишни тўхтатиш учун Украина Донбассдан ўз қўшинларини чиқариши кераклиги ҳақидаги Кремль позициясини тасдиқлади.
Демилитаризация "ҳийласи"
РФ президенти ёрдамчисидан биринчи марта расмий баёнот янгради: Россия Донбассда демилитаризация қилинган ҳудуд яратишга йўл қўйиши мумкин, аммо ўз бошқаруви остида.
Ушаков: “Жуда эҳтимол, у ерда бевосита қўшинлар бўлмайди — на Россиядан, на Украинадан. Ҳа, лекин Росгвардия бўлади, бизнинг полиция бўлади, тартибни сақлаш ва яшаш учун керак бўлган ҳамма нарса бўлади”.
Бироқ, сиёсатшунос Павел Чижовнинг таъкидлашича, бу шунчаки “оғзаки ҳийла”дир.
Чижов: "Росгвардия — худди ўша қуролли кучлар, фақат улар Мудофаа вазирлигига бўйсунмайди холос. Улар, масалан, Киев яқинида бўлган: ОМОН бўлинмалари, машҳур чечен баталонлари... Демак, аслида булар ҳам Россия томонидан агрессив урушнинг худди ўша иштирокчилари ва уларнинг бошқа идорага қарашли бўлиши мутлақо ҳеч нарсани ўзгартирмайди”.
Президент Путин эса бир кун аввал Донбассда Россия ҳужуми янги муваффақиятларга эришганини айтган ва Москванинг асосий вазифаси — минтақанинг Россия томонидан ҳали эгалланмаган ҳудудларидан украин қўшинларини сиқиб чиқариш эканини қўшимча қилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
