Москва шаҳрида 19 декабрь куни Россия президенти Владимир Путин иштирокида йил якунига бағишланган бевосита алоқа ва катта матбуот анжумани бўлиб ўтди. Қарийб 4,5 соат давом этган мулоқот чоғида давлат раҳбари фуқаролар ҳамда журналистларнинг кўплаб саволларига атрофлича жавоб берди. Асосий эътибор эса Украинадаги уруш, фронтдаги вазият ва кейинги режаларга қаратилди.
Президент руслар ва украинлар ўртасидаги қурбонлар учун айбдорлик масаласига тўхталиб, Россия ўзини бу фожеа учун жавобгар деб ҳисобламаслигини таъкидлади. Унинг айтишича, можаро Украинада конституцияга зид қуролли тўнтаришдан кейин бошланган. Шу билан бирга, Москва музокаралар йўли билан урушни якунлашга тайёр эканини билдирди. Бироқ ташаббус, Путин таъбири билан айтганда, Киев раҳбарияти ва уларни қўллаб-қувватлаётган европалик ҳамкорлар қўлида.
Урушдаги ташаббус ҳақида гапирар экан, Россия раҳбари Курск йўналишида душман қувиб чиқарилгандан сўнг стратегик устунлик тўлиқ Россия Қуролли Кучлари томонига ўтганини айтди. Бу эса бутун жанговар алоқа чизиғи бўйлаб қўшинлар олдинга силжиб бораётганини англатади. Айрим ҳудудларда ҳаракат тез, бошқаларида эса эҳтиёткорлик билан олиб борилаётган бўлса-да, барча йўналишларда рақиб чекинмоқда.
Фронтдаги умумий вазиятни изоҳлар экан, Путин Северск аҳоли пунктининг эгалланиши муҳим қадам бўлганини таъкидлади. Ушбу нуқтадан Славянск томон ҳаракат қилиш учун имкониятлар очилмоқда. Шунингдек, Красний Лиман шаҳри яқин орада тўлиқ назоратга олиниши кутилмоқда, айни пайтда унинг қарийб ярми Россия қўшинлари қўлида. Красноармейскнинг эгалланиши эса кейинги ҳужум операциялари учун муҳим таянч нуқта сифатида баҳоланди.
Купянск мавзусига алоҳида тўхталиб, Путин шаҳар бир неча ҳафта олдин Россия назоратига ўтганини билдирди. Унинг сўзларига кўра, у ерда 15 батальондан иборат, тахминан 3500 нафар аскар қуршовда қолган. Уларга қуролни топшириш буйруғи берилмаган ва амалда қаршилик кўрсатиш имкониятлари деярли қолмаган.
Шунингдек, Украина Қуролли Кучларининг йўқотишлари ҳақида гапириб, президент Россия қўшинларининг фаол ҳаракатлари натижасида рақиб стратегик захиралардан айрилганини таъкидлади. Бу ҳолат, унинг фикрича, Киевни можарони тинч йўл билан ҳал қилишга ундаши лозим бўлган муҳим омил ҳисобланади.
Қисқаси, Путиннинг бу галги чиқиши урушдаги вазият, фронтдаги ўзгаришлар ва Москва позициясини очиқ-ойдин ифода этиши билан эътиборни тортди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
