АҚШ ҳарбийлари Венесуэла қирғоқларига яқин ҳудудда навбатдаги нефть танкерини қўлга олди. Бу воқеа АҚШ президенти Доналд Трамп томонидан Венесуэлага кириб-чиқаётган, Америка санкциялари остида бўлган барча нефть танкерларини тўлиқ блокада қилиш ҳақида берилган буйруқдан бир неча кун ўтиб рўй берди.
Каракас расмийлари ушбу ҳаракатни очиқдан-очиқ “ўғирлик” деб баҳолаб, АҚШнинг бундай қадамлари жавобсиз қолмаслигини маълум қилди. Венесуэла ҳукумати халқаро майдонда барча имкониятлардан фойдаланиш, жумладан, БМТ Хавфсизлик кенгашига мурожаат қилиш нияти борлигини билдирди.
Бу икки ҳафта ичида танкер тўхтатилиши билан боғлиқ иккинчи ҳолат ҳисобланади. Эътиборли жиҳати — бу сафар қўлга олинган кема расман АҚШ санкциялари рўйхатига киритилмаган эди. Шу боис, ҳодиса атрофидаги саволлар янада кўпайди.
Сўнгги ойларда АҚШ Венесуэла соҳиллари яқинида ҳарбий иштирокини кескин оширмоқда. Вашингтон бу ҳаракатларни наркотрафикка қарши кураш билан изоҳлаётган бўлса, Каракасда бунга бошқача қараш ҳукм сурмоқда. Венесуэла раҳбариятига кўра, АҚШ мамлакатнинг табиий бойликлари, энг аввало нефть устидан назоратни кучайтириш ва сиёсий тизимни ўзгартиришга уринаётган бўлиши мумкин.
Маълумотларга кўра, сентябр ойидан буён АҚШ Кариб денгизида гиёҳванд моддалар савдосида гумон қилинган 20 дан ортиқ кемани нишонга олган. Бу операциялар оқибатида камида 87 киши ҳалок бўлгани хабар қилинган.
Эслатиб ўтамиз, 10 декабрь куни АҚШ Эрон билан алоқалари сабаб санкция остига тушган Skipper номли йирик нефть танкерини ҳам қўлга олган эди. 20 декабр кунги операция эса АҚШ қирғоқ қўриқлаш хизмати томонидан ҳарбийлар кўмагида амалга оширилди. Махсус тактик гуруҳ халқаро сувларда бўлган кеманинг палубасига чиқиб, уни тўхтатган.
АҚШ ички хавфсизлик вазири Кристи Ноэм ижтимоий тармоқдаги чиқишида етти дақиқалик операция видеосини жойлаб, Америка санкцияларга дуч келган ва минтақада наркотерроризмни молиялаштиришда ишлатиладиган нефть айланмасига қарши курашни давом эттиришини таъкидлади.
ОАВ маълумотларига кўра, шанба куни тўхтатилган Centuries кемаси АҚШ санкциялари рўйхатида бўлмаган. CNN хабарига кўра, Панама байроғи остида сузаётган ушбу кема Осиё томон йўл олган. BBC Verify эса танкер сўнгги беш йил ичида Хитойга тегишли бўлиб, турли даврларда Греция ва Либерия байроқлари остида ҳам ҳаракатланганини қайд этган.
Венесуэла нефтига нисбатан АҚШ санкциялари сақланиб қолган бўлса-да, айрим компаниялар учун истиснолар мавжуд. Хусусан, Америкага тегишли Chevron Венесуэлада қатор конларда бурғилаш ишларини олиб боради ва давлат нефт компанияси Petroleos de Venezuela билан ҳамкорлик қилади.
Юзага келаётган ушбу ҳолатлар АҚШ–Венесуэла муносабатларидаги кескинлик янада кучайиб бораётганини кўрсатмоқда. Бу вазият қандай тус олиши эса яқин ҳафталарда аниқроқ маълум бўлиши мумкин.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
