Украина президенти Володимир Зеленский АҚШнинг махсус вакили Стив Уиткофф ҳамда АҚШ президенти маслаҳатчиси Жаред Кушнер билан телефон орқали мулоқот ўтказганини маълум қилди. Давлат раҳбарининг сўзларига кўра, суҳбат “жуда яхши ва мазмунли” руҳда ўтган.
Зеленский 25 декабрь куни X ижтимоий тармоғидаги саҳифасида ушбу мулоқот давомида ишнинг муҳим жиҳатлари муҳокама қилинганини таъкидлади. Унинг ёзишича, умумий натижага хизмат қиладиган ва барқарор тинчликка олиб бориши мумкин бўлган қатор конструктив ғоялар мавжуд.
Украина президенти америкалик ҳамсуҳбатларига очиқ ва амалий ёндашув, жадал ҳамкорлик ҳамда украиналикларни Рождество байрами билан самимий табриклагани учун алоҳида миннатдорлик билдирди. Зеленский таъкидлаганидек, Киев ҳозирги шароитда узлуксиз, яъни 24 соат давомида иш олиб бормоқда.
— Биз Россиянинг Украинага қарши олиб бораётган урушини тугатишни яқинлаштириш, барча қарорлар ва ҳужжатларни реал, самарали ҳамда ишончли қилиш учун тўлиқ сафарбар этилганмиз, — дея қайд этди у.
Маълум бўлишича, бир кун олдин Зеленский АҚШ ва Киев ўртасида келишилган, урушни тўхтатишга қаратилган режанинг янгиланган ва якуний вариантида муайян ён беришларга эришилганини билдирган эди. Ҳозирда ушбу ҳужжат Москва томонидан ўрганиб чиқилмоқда.
Украина президенти таклиф қилган 20 банддан иборат режада мавжуд фронт чизиғини вақтинча “музлатиш” назарда тутилган. Шу билан бирга, ҳужжат қўшинларни босқичма-босқич ортга тортиш ҳамда демилитаризация қилинган ҳудудларни шакллантириш имкониятини очиб беради.
Қисқаси, Киев дипломатик фронтда фаол ҳаракат қиляпти. АҚШ билан олиб борилаётган бу каби мулоқотлар урушни тўхтатишга қаратилган саъй-ҳаракатлар янги босқичга ўтаётганини кўрсатмоқда.
“Zamin”ни Telegram'да ўқинг!
